Dîwana Paqijkariyê ya Iraqê ragihand ku fermana girtina rêveberê berê yê Dabeşkirina Karenteyê parêzgeha Muthennayê û 12 berpirs û karmendekî din hatiye bicîhkirin, bi tawanbariya zirarêgihandinê bi malê giştî bi rêjeya zêdetir ji 6 milyard dinaran.
Li gorî daxuyaniya Dîwana Paqijkariyê, tîma meydanî ya nivîsgeha lêkolînê ya Muthenna, piştî şopandin û kontrolê li şaxa Muthennayê ya Pargîdaniya Giştî ya Dabeşkirina Karenteyê Başûr, karîbûye xerckirina 6,150,000,000 dinaran (şeş milyard û 150 milyon) eşkere bike; ev pere ji aliyê dezgehê ve ji bo kirîna amûr û materyalên karenteyê hatine xerc kirin, bêyî ku hewcedariyeke rastîn bi wan amûran hebe.
Paqijkariyê amaje bi vê yekê kiriye ku rêveberê berê yê dezgehê ligel tawanbarên din di sala 2024 de, bi mebesta xapandinê û kirîna herî zêde hejmareke tabloyên karenteyê, pîvana yekeya pîvanê û daxwazên kirînê yên xwe guhertine; ji ber vê yekê beşeke mezin ji wan amûran bêyî bikaranîn maye û nehatiye saz kirin, her wiha 48 tabloyên baştirkirina hêza karenteyê hatine avêtin depoya amûrên bikaranî û niha hatine desteserkirin.
Her li gorî daxuyaniyê, dadwerê Dadgeha Lêkolîna Paqijkariyê li Muthennayê biryara binçavkirina rêveberê berê yê Dabeşkirina Karenteyê parêzgehê û 12 karmend derxistiye, li gorî madeya 340 ya Qanûna Cezayê Iraqê; ew ji (rêveberê berê yê hesabkirinê, rêveberê firotanê, berpirsên beşên kontrola navxweyî, stasyonan, depoyan û endamên komîteya kirînê) pêk tên. Di heman demê de fermana girtina 3 karmendekî din jî hatiye derxistin û biryara qedexekirina rêwîtiyê li ser hemû tawanbaran hatiye sepandin.
