Rojnameya "New York Times" eşkere kir ku ji ber bilindbûna gefên ewlehiyê yên Îranê bo asta herî bilind, hukûmeta Amerîkayê asta amadebaşiyê li Rojhilata Navîn bilind kiriye û hejmara karmendên balyozxaneyên xwe li şeş dewletên herêmê kêm dike.
Rojnameya Amerîkî ya "New York Times" ji devê berpirsên welatê xwe ve belav kir: Ji ber berfirehbûna gefên ewlehiyê, hukûmeta Amerîkayê asta hişyariyê û amadebaşiyê di nav karmendên xwe de li seranserê Rojhilata Navîn bilind kiriye û gavan avêtiye bo kêmkirina hejmara karmendên balyozxane û konsolxaneyên xwe li herêmê.
Di raporê de hatiye gotin ku li gorî gotina berpirsên Amerîkî, divê li şandeyên dîplomatîk ên Amerîkayê li her yek ji welatên (Urdun, Lubnan, Qatar, Îmarat, Behreyn û Kuweyt) pergala "karê sînordar" were bicihanîn, bêyî ku dergehên sazgeh û avahiyên dîplomatîk bi temamî bên girtin.
Berpirsên Amerîkayê rave kirin ku gefên Îranê li dijî Amerîkiyan li Rojhilata Navîn gihîştiye asta xwe ya herî bilind ji destpêka şerê mehê Sibata borî ve; di heman demê de ew destnîşan kirin ku şiyana Îranê ya encamdana êrîşan li hundirê axa Amerîkayê hîn jî sînordar e.
Her wiha hatiye eşkere kirin ku desthilatdarên Amerîkayê agahiyên di destê wan de hene li ser îhtîmala hebûna kesên girêdayî Îranê li hundirê Amerîkayê; di heman demê de fikar heye ku Îranê planek hebe ji bo armancgirtina Amerîkiyan li Ewropayê. Di dawiya raporê de hatiye gotin ku Donald Trump, serokê Amerîkayê, bi awayekî rêkûpêk û berdewam raporên istixbaratê li ser wan gefên ewlehiyê werdigire ku sînorên Rojhilata Navîn derbas dikin.
