Padîşahiya Erebistana Siûdî biryar da ku deh-emîn gera konferansa «Înisyatîfa Veberhênana Pêşerojê», ku bi navê «Davosa Çolê» tê naskirin, heta sala 2027’an dereng bixe. Ev yek di demekê de ye ku diviya bû ev konferansa mezin a aborî ya cîhanê di dawiya vê mehê de li bajarê Riyadê bê lidarxistin, lê ji ber zêdebûna tengezariyên leşkerî û êrîşên dawî yên li ser vê welatê, çalakiyên wê hatin rawestandin.
Maha bint Meşarî bin Ebdulazîz, rêvebera giştî ya Bingeha Înisyatîfa Veberhênana Pêşerojê, di daxuyaniyeke fermî de ragihand ku biryara paşxistina vê bûyerê ji pabendbûna vê bingehê bi hevkarên navneteweyî, endam, axaftvan û beşdaran re hatiye girtin û herwiha ji bo ku deh-emîn gera vê civînê bi dirûşma «Hêza Mîrateyê» bi awayekî bêhempa û li gorî cihê cîhanî yê vê konferansê bê lidarxistin. Rêvebera giştî ya vê bingehê herwiha destnîşan kir ku dê di demeke nêzîk de dîroka nû ya civînê di sala 2027’an de bê ragihandin û hemû hevkariyên niha û qeydên heyî dê bi hêz bimînin.
Diviya bû ev civîna navneteweyî di navbera rojên 26 û 29’ê Cotmeha 2026’an de li paytextê (Riyad) bê lidarxistin, lê biryara paşxistina lidarxistina wê di demekê de hate girtin ku di hefteyên borî de sînorên Erebistana Siûdî rastî pêlên zêde û kompak ên êrîşên mûşekan û dronan ji aliyê çekdarên Hûsî (Ensarullah) ve hatibûn. Di dema van pevçûnan de, çendîn navendên hestiyar ên sivîl û leşkerî û binesaziyên enerjiyê, ji wan navenda şirketê neftê Aramco û balafirgeha navneteweyî ya Riyadê, hatibûn armancgirtin.
