Rojnameya amerîkî ya ''Wêl Strît Curnal'' eşkere kir ku Benjamin Netanyahu, serokwezîrê Îsraîlê, zexta giran li ser Amerîkayê dixe da ku êrîşên leşkerî li hundirê Îranê ji nû ve dest pê bikin; di hemberî vê yekê de, Qesra Spî dubare kiriye ku berî hilbijartinên nîve-dorê tu êrîşek nayê kirin.
Rojnameyê ji devê berdevkê Qesra Spî belav kiriye ku Amerîka berî hilbijartinên nîve-dorê êrîşî Îranê nake. Di heman demê de, berpirsên herêmê li Rojhilata Navîn nîşan dane ku bi girîngî û hişyarî li metirsiyên belavbûna tevliheviyan dinêrin, bi taybetî di siya gefên domdar ên Donald Trump, serokê Amerîkayê, û israra Tehranê ya redkirina daxwazên Washingtonê de.
Li gorî agahiyên Wêl Strît Curnalê, Netanyahu hîn jî hewl dide Amerîkayê razî bike da ku êrîşên leşkerî yên li dijî kûrahiya axa Îranê ji nû ve dest pê bikin. Di vê çarçoveyê de, Îsraîlê, li ser bingeha agahiyên îstîxbaratî, lîsteyek ji komeke armancên pêşniyazkirî ji bo lêdan û bombebaranê pêşkêşî Pete Hegseth, wezîrê parastinê yê Amerîkayê, kiriye.
