سەرۆکایەتیی شارەوانیی سلێمانی ئاگادارییەکی بڵاو کردەوە و ڕایگەیاند، شەقامی ڕۆیشتن لە ئاڕاستەی سلێمانییەوە بەرەو کەرکووک بۆ ماوەیەک بەربەست دەکرێت، هاوکات داوا لە شۆفێران دەکات کە شەقامی جێگرەوە بەکاربهێنن.
لە ڕاگەیەندراوێکدا، سەرۆکایەتیی شارەوانیی سلێمانی هاوڵاتییان و شۆفێران ئاگادار دەکاتەوە، بەهۆی بەردەوامبوونی کار لە یەکتربڕی ژمارە 11ـی شەقامی 100 مەتری کە دەکەوێتە ناوچەی تاسڵوجە، بە هاوکاری و هەماهەنگی بەڕێوەبەرایەتیی هاتوچۆی سلێمانی، شەقامی ڕۆیشتن لە ئاڕاستەی سلێمانییەوە بەرەو کەرکووک، لە دوانیوەڕۆی دووشەممە 14ـی ئەیلوولی 2026، بۆ ماوەیەک بەربەست دەکرێت.
شارەوانیی سلێمانی داوا لە هاوڵاتییان و شۆفێران دەکات بۆ ئاسانکاریی هاتوچۆ و پاراستنی سەلامەتی خۆیان، هاوکاریی تیمەکانمان بکەن و بەپێی نەخشەی دیاریکراو و بە گوێرەی هێما و ڕێنیشاندەری هاتوچۆی دانراو لە شەقامەکە، شەقامی جێگرەوە بەکاربهێنن بۆ ڕۆیشتن لە سلێمانییەوە بەرەو کەرکووک.
