ئەمڕۆ یەکشەممە 1ـی تشرینی دووەمی 2026، ئاژانسی دەنگوباسی ناوەندیی کۆریای باکوور (KCNA) بڵاوی کردەوە: دەستەی مووشەکیی کۆریای باکوور لە 31ـی تشرینی یەکەمدا، تاقیکردنەوەیەکی مەیدانیی بۆ هەڵسەنگاندنی ئاستی گونجاوی و توانای وێرانکاریی کڵاوەیەکی جەنگیی هێشوویی ئەنجام داوە کە بە تایبەت بۆ مووشەکە بالیستییە تەکتیکییەکان دیزاین کراوە.
لە ڕاگەیەندراوەکەدا هاتووە کە تاقیکردنەوە مەیدانییەکان تیشکیان خستووەتە سەر پێوانەکردنی هێزی وێرانکاریی ئەم کڵاوە جەنگییە و توانای لە ئۆپەراسیۆنە سەربازییە ئاڵۆزەکاندا، هاوکات ئاژانسەکە ڕوونیکردەوە کە کڵاوە جەنگییەکە لە مۆدێلی ستانداردی (جۆری 2)ـیە و بۆ پێکانی ئەو ئامانجانە دیزاین کراوە کە لەسەر ڕووبەرێکی بەرفراوان لە نێوان (12 بۆ 13) هێکتاردا بڵاوبوونەتەوە، ئەمەش توانای بەرپەرچدانەوەی سەربازیی وڵاتەکە دژ بە هەر جووڵەیەکی نەیاران بەهێزتر دەکات.
کۆریای باکوور لەم دواییانەدا گرنگییەکی تایبەتی بە پەرەپێدانی "مووشەکی بالیستی تەکتیکی" داوە، کە مووشەکی مەوداکورت و مەوداناوەندن و بە مەبەستی پێکانی ئامانجی دیاریکراو بە وردییەکی زۆر و خێراییەکی گەورە دروست دەکرێن، ئەم تاقیکردنەوە نوێیەش لە چوارچێوەی هەوڵە بەردەوامەکانی پیۆنگ یانگدایە بۆ بەهێزکردنی جبەخانە مووشەکییەکەی و هەمەچەشنکردنی جۆرەکانی تەقەمەنی.
