لە ڕاگەیەندراوەکەدا هاتووە، لە ڕۆژانی 28 تا 30ـی تشرینی یەکەمی 2026 لە شاری ئیستەنبۆڵی تورکیا، لەلایەن "یەکێتیی جیهانیی زانایانی موسڵمان" کۆنگرەیەک بە ناونیشانی (وحدة الأمة الوسط: من الثوابت إلى ميثاق الوحدة) بە بەشداریی کەسایەتییە دیارەکانی جیهانی ئیسلامی بەڕێوەچوو، بەڵام وێڕای بانگهێشتنەکردنی یەکێتیی زانایانی ئایینیی کوردستان، لە بەلاغی کۆتایی کۆنگرەکەدا بە یەک وشەش باسی ماف و ستەملێکراویی گەلی کوردی موسڵمان نەکراوە.
یەکێتیی زانایان ئاماژەی بەوە کردووە، کەم نەتەوە هەیە هێندەی کورد ڕووبەڕووی زوڵم، زۆرداری، کیمیاباران، ئەنفال و زەوتکردنی مافی چارەی خۆنووسین بووبێتەوە لە ماوەی 100 ساڵی ڕابردوودا، جەختیشی کردەوە: کورد لە ڕووی ئایینییەوە بەشێکی دانەبڕاوە لە ئۆمەتی ئیسلامی، بەڵام وەک نەتەوە گەلێکە کە خودای گەورە ناسنامە و زمانی تایبەتی پێبەخشیوە.
لە کۆتایی پەیامەکەدا هاتووە: گلەییمان ئاراستەی ڕێکخەرانی کۆنگرەکە و بەشداربووان دەکەین، چونکە دەبوو باسی پرسی ڕەوای کورد بکرێت کە دراوسێی نزیکی کۆنگرەکە بوو، نەک باسی وڵاتانی ئەوسەری دونیا بکرێت و پرسی نەتەوەیەکی ستەملێکراوی وەک کورد بە تەواوی پەراوێز بخرێت.
