ئەمڕۆ بەبۆنەی ڕۆژی زمان و کولتووری تورکمانییەوە، نێچیرڤان بارزانی، سەرۆکی هەرێمی کوردستان پەیامێکی ئاراستەی هاووڵاتییانی تورکمان لە هەرێمی کوردستان و عێراق کرد.
نێچیرڤان بارزانی، سەرۆکی هەرێمی کوردستان، لە پەیامەکەیدا ڕایگەیاند: بەبۆنەی ڕۆژی زمان و کولتووری تورکمانییەوە، بەگەرمی پیرۆزبایی لە هەموو هاووڵاتییانی تورکمان لە کوردستان و عێراق بەگشتی دەکەم، بە ڕێز و پێزانینەوە لە ئامادەیی و ڕۆڵی مێژوویی و کولتوورییان دەڕوانین.
لە بەشێکی دیکەی پەیامەکەیدا، نێچیرڤان بارزانی جەختی لە پشتیوانیی بەردەوامی هەرێمی کوردستان بۆ پاراستن و گەشەپێدانی زمان، ڕۆشنبیری و مافە کولتوورییەکانی پێکهاتەی تورکمان و سەرجەم پێکهاتەکانی دیکە کردەوە.







