لە سنووری قەزای ئامێدی، ڕووداوێکی هاتوچۆ لە نێوان دوو ئۆتۆمبێلدا ڕوویدا و بەهۆیەوە 2 کەس بریندار بوون.
ئەمڕۆ یەکشەممە 6ـی ئەیلوول، جەرجیس عیسا ئەردەنی، لە بەڕێوەبەرایەتیی هاتوچۆی ئامێدی بە (کوردستان تیڤی) ڕایگەیاند، ڕووداوەکە لەسەر ڕێگەی سەرەکیی نێوان کۆمەڵگەی قەدشێ و هاوینەهەواری سیلاڤ، لە نزیک گوندی هەمزیکێ ڕوویداوە.
ئاماژەی بەوەش کرد، ڕووداوەکە لە نێوان دوو ئۆتۆمبێل لە جۆرەکانی (هۆندا و بی ئێم دەبلیو) بووە. بەهۆی سەختیی برینەکانیانەوە، هەردوو بریندارەکە بۆ نەخۆشخانەی فریاکەوتنی دهۆک گواستراونەتەوە.
بەڕێوەبەرایەتیی هاتوچۆی ئامێدی داوا لە شۆفێران دەکات، پابەندی ڕێنماییەکانی هاتوچۆ بن و بە وریاییەوە لێخوڕن، بۆ ئەوەی دووربن لە ڕووداوی لەم شێوەیە و پارێزگاری لە گیانی خۆیان و سەرنشینەکانیان بکەن.
