بەڕێوەبەرایەتی گشتی کاروباری مین لە پارێزگای هەولێر، هۆشدارییەکی بەپەلە ئاراستەی هاووڵاتییان و گەنجان دەکات و داوایان لێدەکات لە پێناو کۆکردنەوەی "لایک و بینەر" لە تۆڕە کۆمەڵایەتییەکان، ژیانی خۆیان نەخەنە مەترسییەوە.
بڵاوکردنەوەی ئەم ڕاگەیەندراوە دوای ئەوە دێت، کە چەند گەنجێک لە گرتەیەکی ڤیدیۆییدا دەرکەوتوون کە بە مەبەستی کۆکردنەوەی لایک و زیادکردنی بینەر لە تۆڕە کۆمەڵایەتییەکان، بێباکانە دەستکاری پاشماوەی مووشەکی نەتەقیو دەکەن و ژیانی خۆیان و دەوروبەریان دەخەنە مەترسییەکی گەورەوە.
لە ڕاگەیاندراوێکدا کە ئەمڕۆ بڵاوکراوەتەوە، بەڕێوەبەرایەتییەکە ئاماژەی بەوە کردووە، دوای گرژی و ئاڵۆزییەکانی دوایی، ژمارەیەک پاشماوەی جەنگیی نەتەقیوی مەترسیدار وەک (مووشەک و درۆن) لە ناوچە شاخاوی و سنوورییەکان کەوتوونەتە خوارەوە، ئەمەش مەترسییەکی ڕاستەقینەی لەسەر ژیانی هاووڵاتییان دروست کردووە.
عەلی عبدالرحمان، بەڕێوەبەری گشتی کاروباری مین لە هەولێر ڕایگەیاند: "چوونە ناو کێڵگەکانی مین و شوێنی کەوتنەخوارەوەی مووشەکەکان بە مەبەستی وێنەگرتن و سێڵفی، هەڵسوکەوتێکی زۆر مەترسیدارە و ڕەنگە ببێتە هۆی کارەساتێکی نەگەڕاوە." جەختیشی کردەوە کە "هەڵەی یەکەم لە جیهانی تەقەمەنیدا، زۆرجار هەڵەی کۆتایییە."
بەڕێوەبەرایەتییەکە داوا لە هاووڵاتییان دەکات بە تەواوی پابەندی ئەم 3 ڕێنماییەبن:
1- بە هیچ شێوەیەک لە پاشماوەی مووشەک، درۆن و هەرتەنێکی نامۆ نزیک مەبنەوە و هەوڵی دەستلێدان یان وێنەگرتنیان مەدەن.
2- لەم ماوەیەدا لە چوونە ناو دۆڵ و پێدەشتە پشکنین نەکراوەکان دووربکەونەوە و تەنها ڕێگا گشتییەکان بەکاربهێنن.
3- لە کاتی بینینی هەر تەنێکی گومانلێکراو، بێدواخستن پەیوەندی بە هێڵی گەرمی دەزگای مین بکەن لە ڕێگەی ژمارەی (182.
لە کۆتایی ڕاگەیاندراوەکەدا هاتووە، کە پاراستنی سەلامەتی گشتی ئەرکی هەمووانە و داوا لە بەکارهێنەرانی تۆڕە کۆمەڵایەتییەکان دەکرێت بەرپرسیارانە ڕەفتار بکەن تا لایەنە پەیوەندیدارەکان ناچار نەبن ڕێکاری یاسایی بگرنەبەر.
