فەرمانگەی پەیوەندییەکانی دەرەوەی هەرێمی کوردستان و کونسوڵخانەی گشتیی هەنگاریا، پەرەپێدانی پەیوەندییە ئابوورییەکان و دوایین ئاستی پەیوەندییەکانی نێوان هەولێر و بەغدایان لە ژێر ڕۆشنایی گۆڕانکارییەکانی ناوچەکەدا گەنگەشە کرد.
لە کۆبوونەوەیەکدا کە ئەمڕۆ سێشەممە (28ی تەممووزی 2026) لە نێوان سەفین دزەیی، بەرپرسی فەرمانگەی پەیوەندییەکانی دەرەوە و دۆمینیکا کۆڤاچ، کونسوڵی گشتیی هەنگاریا بە وەکالەت بەڕێوەچوو، هەردوولا جەختیان لەسەر میکانیزمەکانی سوودوەرگرتن لە ئەزموونی بوداپێست کردەوە بۆ بەهێزکردنی سێکتەرە دیپلۆماسی و بازرگانییەکانی هەرێمی کوردستان.
بەشێکی سەرەکیی گفتوگۆکان تەرخانکرا بۆ دۆخی سیاسیی ناوخۆی هەرێم و پەیوەندییەکانی لەگەڵ حکومەتی فیدراڵیی عێراق. لەم تەوەرەدا، بەرپرسی فەرمانگەی پەیوەندییەکان ڕوانگەی فەرمیی حکومەتی هەرێمی کوردستانی لەبارەی پرسە هەڵپەسێردراوەکان و چۆنیەتی مامەڵەکردن لەگەڵ ئەو بارگرژییە ئەمنییانە خستە ڕوو کە لە ئێستادا ناوچەکەی گرتووەتەوە.
هەنگاریا، کە وەک یەکێک لە هاوبەشە ئەوروپییە چالاکەکانی هەرێمی کوردستان دەبینرێت، لە چەند ساڵی ڕابردوودا لە ڕێگەی هاوکاریی سەربازی و مرۆییەوە دەورێکی دیاری هەبووە. ئەم دیدارە نوێیەش لە کاتێکدایە کە هەرێمی کوردستان هەوڵ دەدات لە ڕێگەی فرەچەشنکردنی پەیوەندییە نێودەوڵەتییەکانی، پاڵپشتیی زیاتر بۆ سەقامگیریی سیاسی و گەشەی ئابووریی خۆی بەدەستبهێنێت.
