جارێکی دیکە دۆخی کارەبای نیشتمانی لە هەرێمی کوردستان ڕووبەڕووی گرفت بووەتەوە و کاتژمێرەکانی پێدانی کارەبا بە هاووڵاتیان کەمی کردووە. ئەم دۆخە شەپۆلێکی گلەیی و ناڕەزایەتی لە ناو هاووڵاتیاندا لێکەوتووەتەوە، لە بەرامبەریشدا وەزارەتی کارەبا دووپاتی دەکاتەوە کە تیمەکانیان بەردەوامن لە کارکردن بۆ چارەسەرکردنی کێشەکان و ئاساییکردنەوەی دۆخەکە.
کوردستان تیڤی بۆ بەدواداچوونی زیاتری ئەم پرسە، پەیوەندی بە سەرچاوەیەکی تایبەت لە ناو وەزارەتی کارەباوە کردووە. بەپێی زانیارییەکانی ئەو سەرچاوەیە، تێکچوونی باری کارەبا بۆ دوو هۆکاری سەرەکی دەگەڕێتەوە:
یەکەم: کەمبوونەوەی ئاستی بەرهەمهێنان
سەرچاوەکە ئاماژەی بەوە کردووە کە لەم ماوەیەی دواییدا ئاستی بەرهەمهێنانی وزەی کارەبا کەمی کردووە. بە وتەی سەرچاوەکە، ئەم کێشەیە ڕاستەوخۆ پەیوەندی بە وەزارەتی کارەباوە نییە، بەڵکو پەیوەستە بەو کۆمپانیایانەی کە ئەرکی بەرهەمهێنانی وزەیان لە ئەستۆیە. ئەو کۆمپانیایانە بەهۆی هەندێک گرفتی تەکنیکی یان داراییەوە ئاستی بەرهەمهێنانیان کەم کردووەتەوە، ئەمەش کاریگەری ڕاستەوخۆی کردووەتە سەر ئەو بڕە کارەبایەی کە دەخرێتە ناو تۆڕی نیشتمانییەوە. وەزارەتی کارەبا چاوەڕوانە ئەو کۆمپانیایانە گرفتەکانیان چارەسەر بکەن تاوەکو بڕی بەرهەمهێنان بگەڕێتەوە ئاستی جاران.
دووەم: بەرزبوونەوەی پێوانەیی خواست لەسەر کارەبا
هۆکاری دووەم بۆ وەرزی گەرما و بەرزبوونەوەی پلەکانی گەرما دەگەڕێتەوە. لەگەڵ هاتنی وەرزی هاوین، خواستی هاووڵاتیان بۆ بەکارهێنانی کارەبا بە شێوەیەکی بەرچاو زیادی کردووە. بەپێی ئامارە نافەرمییەکان، لە هەرێمی کوردستان 100%ی هاووڵاتیان بۆ فێنکەرەوە و پێداویستییەکانی تری ژیانی ڕۆژانە تەنها پشتیان بە وزەی کارەبا بەستووە. ئەم فشارە زۆرەی سەر تۆڕی کارەبا، بارگرانییەکی گەورەی بۆ وەزارەتەکە دروست کردووە، هەرچەندە وەزارەت ئاماژە بەوە دەدات کە دابینکردنی کارەبا مافێکی سەرەتایی هاووڵاتیانە.
ئێستا وەزارەتی کارەبا لە هەوڵی بەردەوامدایە بۆ ئەوەی لە ڕێگەی هەماهەنگی لەگەڵ کۆمپانیاکانی بەرهەمهێنان و بەڕێوەبردنی بڕی وزەی بەردەست، کاتژمێرەکانی پێدانی کارەبا جێگیر بکات و ئەو کورتهێنانە پڕ بکاتەوە کە بەهۆی ئەو دوو گرفتە سەرەکییەوە دروست بووە.
گوێ بگرە0:00
0:00
قەبارەی دەق
