لەگەڵ زیادبوونی ڕێژەی هاوردەکردنی ئۆتۆمبێلە ئەمریکییەکان بۆ بازاڕەکانی هەرێمی کوردستان و عێراق، جۆرەها کێشەی تەکنیکی و سۆفتوێری سەریان هەڵداوە کە کڕیاران پێشتر چاوەڕوانیان نەدەکرد. یەکێک لە بێزارکەرترین و باوترین ئەو کێشانە، گرفتی "نۆیز" و تێکچوونی کوالێتی دەنگە لە سیستەمی کات‌بەسەربردنی (Infotainment System) ئۆتۆمبێلە نیسانەکان، بەتایبەتی لە هەردوو مۆدێلی نیسان کیکس (Nissan Kicks) و نیسان سێنترا (Nissan Sentra).
ڕەهەندی تەکنیکی کێشەکە: لە وەشانی 423 بۆ 500
ئەو بەکارهێنەرانەی خاوەنی ئەم دوو مۆدێلە مۆدێرنەی نیسانن، کۆکن لەسەر ئەوەی کە سیستەمی دەنگی ئۆتۆمبێلەکانیان لە کاتی بەکارهێنانی "بلوتوز"، "کارپڵەی" (Apple CarPlay) یان تەنانەت میمۆری و فلاشدا، تووشی نۆیزێکی توند و ناڕوونی دەبێت. بەپێی شیکارییە سۆفتوێرییەکان، ئەم کێشەیە پەیوەندی بە وەشانی فێرموێر (Firmware) هەیە.
زۆربەی ئەو ئۆتۆمبێلانەی ئەم کێشەیەیان تێدایە، لەسەر وەشانی 423 کار دەکەن. ئەم وەشانە بەهۆی هەڵەیەکی کۆدڕێژییەوە لە سیستەمی لێکدانەوەی دەنگ (Audio Processing)، ناتوانێت شەپۆلە دەنگییەکان بە ڕوونی بگوازێتەوە. تاقە چارەسەری بنەڕەتی کە کۆمپانیای نیسانی دایک لە ئەمریکا دانی پێدا ناوە، بەرزکردنەوەی وەشانی سۆفتوێرەکەیە بۆ وەشانی 500 یان بەرزتر. ئەم ئەپدەیتە نەک تەنیا نۆیزەکە ناهێڵێت، بەڵکو خێرایی کارکردنی شاشەکە و پەیوەندییە بێتەلەکانیش جێگیرتر دەکات.
گرێکوێرەی بریکارەکان لە عێراق و کوردستان
گورزی سەرەکی کاتێک بەر کڕیاری کورد دەکەوێت کە سەردانی بریکارە فەرمییەکانی نیسان دەکات لە هەرێمی کوردستان (وەک نیسان عێراق یان بریکارە ناوخۆییەکان). لێرەدا کێشەکە لە تەکنیکییەوە دەبێتە "یاسایی و جوگرافی":
سنووردارکردنی دەسەڵات: بریکاری نیسان لە هەرێمی کوردستان تەنیا مۆڵەتی کارکردنی لەسەر ئەو ئۆتۆمبێلانە هەیە کە بە (Middle East Spec) یان "نیسانی ڕۆژهەڵاتی ناوەڕاست" ناسراون.
نەبوونی سێرڤەری ئەمریکی: بریکارەکان ڕایدەگەیەنن کە ئامێرە پشکنەرەکانی ئەوان (Diagnostic Tools) تەنیا دەستیان بە سێرڤەرەکانی ناوچەی کەنداو و ڕۆژهەڵاتی ناوەڕاست دەگات. بۆیە ئەوان توانای دابەزاندنی (Download) ئەپدەیتی وەشانی 500ی تایبەت بە مۆدێلە ئەمریکییەکانیان نییە. بەرپرسیارێتی کۆمپانیا: بریکارەکان خۆیان لە وەرگرتنی ئەو ئۆتۆمبێلانە دەڵێن "ئەم ئۆتۆمبێلانە لە دەرەوەی بازنەی گارانتی و خزمەتگوزاری ئێمەن"، ئەمەش کڕیار لە نێوان نیسانی دایک لە ئەمریکا و بریکاری ناوخۆدا بە بێ چارەسەر دەهێڵێتەوە.
کاریگەرییە ئابووری و دەروونییەکان
بەکارهێنەر کاتێک بڕێکی زۆر پارە لە ئۆتۆمبێلێکی مۆدێل 2020 بۆ 2024خەرج دەکات، چاوەڕوانی سیستەمێکی دەنگی مۆدێرن دەکات، بەڵام بوونی نۆیز وا دەکات هەست بەوە بکات ئۆتۆمبێلەکەی کوالێتی نزمە, ئەم کێشەیە وای کردووە زۆرێک لە کڕیاران پەنا بۆ "وەستا"ی دەرەکی و هاککردنی سیستەمەکە ببەن، کە ئەمەش مەترسی سووتانی شاشەکە یان تێکچوونی سیستەمی کارەبایی (BSI) لێ دەکەوێتەوە.
هەزاران ئۆتۆمبێلی نیسان کیکس و سێنترا لە عێراقدا هەن کە بەدەست ئەم کێشەیەوە دەناڵێنن. پێویستە بریکارەکانی نیسان لە کوردستان و عێراق
پەیوەندییەکی ڕاستەوخۆ لەگەڵ نیسانی ئەمریکا دروست بکەن بۆ وەرگرتنی فایلەکانی ئەپدەیتی وەشانی 500 وەک خزمەتگوزارییەکی دەرەکی (Out of Warranty Service).
سەکۆیەکی ئۆنلاین یان "فلاش میمۆری" تایبەت دابین بکەن بۆ ئەو کڕیارانەی ئۆتۆمبێلی ئەمریکییان هەیە، تاوەکو بە پارەیەکی گونجاو کێشە تەکنیکییەکانیان بۆ چارەسەر بکرێت.
بێدەنگبوونی بریکارەکان و تەنیا کارکردن لەسەر مۆدێلەکانی ڕۆژهەڵاتی ناوەڕاست، زیانێکی گەورە بە ناوبانگی براندە ژاپۆنییەکە (نیسان) دەگەیەنێت لە بازاڕی عێراقدا، کە یەکێکە لە پڕفرۆشترین بازاڕەکانی ناوچەکە.
