بەیانیی ئەمڕۆ یەكشەممە نێچیرڤان بارزانی، سەرۆكی هەرێمی كوردستان، بەشداريی لە ڕێوڕەسمی ده‌رچوونى خولی پێنجەمی پێگەیاندنی ئەفسەران لە كۆلێژی سەربازیی سێی قەڵاچوالاندا لە سلێمانی كرد.
لە ڕێوڕەسمەكەدا نێچیرڤان بارزانی وتارێكی پێشكەش كرد، ئەمە دەقەكەیەتی:
دەرچووانی ئازیز،
ئامادەبووانی خۆشەویست،
ڕۆژتان باش،
هەمووتان زۆر بەخێر بێن، بۆ ڕێوڕەسمی دەرچوونی خولی پێنجەمی پێگەیاندنی ئەفسەران لە کۆلێژی سەربازیی سێى قەڵاچوالان لە شاری سلێمانیی خۆشەویست. ئەم دیمەنە پڕ لە دیسپلین و ڕێکخراو و شکۆدارە، جێگەی شانازیی ئێمە و خێزانەکانتان و تەواوی گەلی کوردستانە.
زۆر خۆشحاڵ و سەربەرزین کە ئەمڕۆ پێکەوە شایەدی دەرچوونی (210) ئەفسەری گەنج و هۆشیار و لێهاتووی کوردستانین. ئەم ئەفسەرانە دوای (9) مانگ لە ماندووبوون و شەونخونی، خولی مەشقی سەربازی، ئەکادیمی و پراکتیکیی خۆیان سه‌ركه‌وتووانه بەکۆتا هێناوە. ئەوان ئیتر وەک هێزێکی نوێ و زانستی دێنە ناو په‌يكه‌رى وەزارەتی پێشمەرگە، تا پەرە بە سیستەمی بەرگریی نیشتمانیی وڵاتەکەمان بدەن.
جێگەی دەستخۆشی و مایەی گەشبینییە کە دوای تەواوکردنی خوێندنی زانکۆ، ئێوه، ئێوەی خۆشەویست خۆبەخشانە، بە ویست و بڕياری خۆتان هاتوونەتە ناو ڕیزەکانی خوێندنی سەربازی. ئەمە بەرزترین ئاستی دڵسۆزی، ئاگايى و نیشتمانپەروەریی ئێوە پیشان دەدات بۆ گەلی خۆتان.
ئێمە و دايكوباوكتان، دڵسۆزەکانتان، كه‌سوكارتان و هاوكارەكانتان، بەم بڕیارەى ئێوە سەربەرز و دڵخۆشین و هیوای سەركەوتنتان بۆ دەخوازین. لە ناخی دڵەوە به گه‌رمى پیرۆزبایی لە ئێوە و لە خێزانە ئازیزیەکانتان دەکەم بۆ ئەم سەركەوتنەی كە بەدەستتان هێناوە. خوای گەورە پشتیوانتان بێت لە ژیان و كارەكانتان سەركەوتوو و سەرفراز و سەربڵند بن.
هەر لێرەدا مام جەلال بە ڕێزەوە بەبیر دەهێنینەوە كە لە ساڵی 1992 ئەم كۆلێژە بە فەرمانی جەنابیان دامەزرا بۆ ئەوەی خزمەت بە وڵات و خزمەت بە كوردستان و خزمەت بە تەواوی عێراق بكرێت.
دەرچووانی هێژا،
ناو و پێناسه‌ی پێشمەرگە، زۆر پیرۆزن. پێشمەرگایەتی بەشێکی زێڕین و سەرەکیی ناسنامەی نیشتمانی و نەتەوایەتیمانە. ئەرکی هه‌موومانه کە پارێزگاری لە ناوبانگ و لە شکۆ و لە مێژووی پڕ لە شانازی، لە خه‌بات و قوربانییەکانی پێشمەرگە بکەین. ئەمه‌ش به‌وه ده‌كرێت كه ئێوه‌ى ئازيز و خۆشەویست ده‌بێ له چوارچێوەی هێزێکی یەکگرتوو، پیشەیی و نیشتمانیدا، خزمه‌ت بكه‌ن.
لەم سه‌رده‌مه نوێیەدا، ئەرکی ئێوە تەنیا لە مەیدانەکانی ڕووبەڕووبوونەوەی کلاسیکدا کورت ناكرێتەوە، به‌ڵكوو پێویستە ئێوە بە گۆڕانکارییەکانی سەردەم، نوێگەری و ڕۆحی داهێنان ڕابێن.
خۆپێگەیاندنی بەردەوام لەڕووی زانستی و پیشەیییەوە، دەبێ ببێتە ستراتیژی کاركردنتان لە کاروانی داهاتووی ژیانتان، گرنگیی پێویست بە فێربوونی تەکنەلۆژیای سەربازیی هاوچەرخ بدەن بۆ ئەوەی هاوتەریبی پێشکه‌وتنەکانی جیهان بن.
ده‌بێ هه‌ستى ئاسايشى نه‌ته‌وه‌يى و نيشتمانيتان به‌هێز بێت و خوێندنه‌وه‌تان بۆ هه‌ڕه‌شه و مه‌ترسييه‌كانى ده‌وروبه‌ر هه‌بێت، له هه‌ر بوارێكدا بێت. له مه‌ترسييه‌كانى تيرۆر و توندڕه‌وى و گوتارى ڕقوكينه‌وه، تا ده‌گاته مه‌ترسييه ئه‌منييه‌كان. پێويسته ئاگايى و هۆشياريتان له‌مباره‌يه‌وه به‌هێز بكه‌ن.
بێگومان، لەپاڵ ئەم ئەرکە پیرۆزەدا، گرنگیدان بە بژێویی ژیانى پێشمەرگە قارەمانەکان و باشترکردنی گوزەرانیان، هەمیشە لە پێشينه‌ى کارەکانی ئێمەدا دەمێنێتەوە، چونکە ئێوە شایەنی ژیانێکی سەربەرزن.
ده‌رچووانى ئازيز،
ئێوه سه‌ركه‌وتووانه قۆناغێكى گرنگتان تێپه‌ڕاند، به‌ڵام بەرپرسیاریەتیتان لەمڕۆوە فراوانتر و قورستر دەبێت. ئێوە دەبێ لە ناو هێزى پێشمه‌رگه‌دا ببنە پارێزەری سەرەکیی چەمکەکانی پێکەوەژیان، لێبوردەیی و یەکترقبووڵکردن.
ئه‌و كولتووره‌ى شانازيى پێوه ده‌كه‌ين و هه‌رێمى كوردستانى کردووەتە لانکەی ئارامی بۆ هەموو ئایين و نەتەوە جیاوازەکان و بووەتە مایەی ڕێز و پێزانینی تەواوی کۆمەڵگەی نێودەوڵەتی.
ئێوە دەبێ پارێزەری چەمک و بەها مەدەنییەکان، دیموکراسی، مافەکانی مرۆڤ و ئازادییە گشتییەکان بن. هیچ کات مەبنە بەشێک و لایەنێکی کێشە و ململانێ سیاسییەکان، بەڵکوو هەمیشە ده‌بێ وەک هێزێکی نیشتمانیی كوردستانی بمێننەوە و بەرگری لە شكۆى مرۆڤ بکەن بێ جیاوازی لەم وڵاتەدا.
ئامادەبووانی به‌ڕێز،
پەیامی هەمیشەییی ئێمە بۆ ناوخۆی کوردستان، يه‌كهه‌ڵوێستى، تەبایی، پێكه‌وه‌يى و کۆدەنگییە لەنێوان سەرجەم هێز و لایەنە سیاسییەکان و پێکهاتەکانی کوردستاندا. هێز و مانەوەی هەرێمی کوردستان کاتێک مسۆگەر دەبێت کە ئێمە لە ناوخۆماندا ته‌با بین و بەرژەوەندییە باڵاکانی نیشتمان بخەینە سەرووی هەموو ململانێ و جیاوازییەکی ديكه‌وه.
فرەڕەنگیمان دەوڵەمەندیمانه، هه‌موو پێكهاته‌كانى كوردستان له هه‌ر نه‌ته‌وەیەك و ئايينێك بن، پێکەوە شوناسی جوانی ئەم نیشتمانە پێک دەهێنن. ئه‌مه جوانييه‌كى زۆر و هێزێكى گه‌وره‌يه بۆ كوردستان.
هه‌ر له‌م بۆنه‌يه‌دا، جارێکی تر سوپاس و پێزانینى هەرێمی کوردستان پێشكه‌ش به هێزەکانی هاوپەیمانیی نێودەوڵەتی بە سەرۆکایەتیی ئەمه‌ریکا دەکەم کە لە شەڕی دژی داعشدا زۆر دڵسۆزانە پشتیوانیی سه‌ربازیی عێراق و هەرێمی کوردستانیان کرد و هاوکارمان بوون لە تێکشکاندنی تیرۆردا.
سوپاس و پێزانينمان دووپات ده‌كه‌ينه‌وه بۆ بەردەوامی و دڵسۆزیی وڵاتانی دۆست و هاوپەیمانان کە لە پرۆسەی چاکسازیی وەزارەتی پێشمەرگە و یەکگرتنەوەی هێزەکانى پێشمه‌رگه‌دا، هاوکار و یارمەتیدەرێکی گرنگ و جدديى ئێمەن.
ڕاستە هەنگاوی باش نراوە، بەڵام خواستى ئێمه له‌وه زياتره و پێویستە هەنگاوه‌كان زۆر خێراتر بکرێن. ده‌بێ سستیيه‌كانى ئه‌م پرۆسه‌يه چاره‌سه‌ر بكرێن. ئاڵنگارييه‌كان و ململانێكانى ناوچه‌كه، ئه‌وه‌مان لێ ده‌خوازێت ڕۆژێك زووتر ئه‌م ئه‌ركه جێبه‌جێ بكه‌ين كە خزمەت بە هەموو كوردستان و عێراق دەكات.
بۆيه هه‌موو لايه‌ك دڵنیا دەکەينەوە، کە ئێمە بە ئیرادەیەکی جددى و بەهێزەوە بەردەوام دەبین بۆ تێپەڕاندنی ئاستەنگەکان و سەرخستنی ئەم پرۆسە چارەنووسسازە، چونكه یەکگرتوویيی پێشمەرگە، گه‌ره‌نتى و بنه‌مايه‌كى سه‌ره‌كيى پاراستنی مافه ده‌ستوورييه‌كان و قەوارەی فيدراڵيى هەرێمى كوردستانە.
ده‌رچووانى خۆشه‌ويست،
ئەمڕۆ، بە شانازییەوه لەژێر سایە و شکۆی ئاڵای کوردستان و ئاڵای عێراقدا دەردەچن. ئەمە گوزارشتێکی ڕاستەقینەیە لەو واقیعەی کە هەرێمی کوردستانی فیدراڵ، وه‌ك قه‌واره‌يه‌كى ڕه‌واى ده‌ستووريى دانپێدانراو، بەشێکی به‌هێزى دەستووری، یاسایی و بنەڕەتییە لە چوارچێوه‌ى ده‌وڵه‌تى عێراقی فیدراڵیدا.
بۆيه پێویستە حکوومەتی فیدراڵ لە بەغدا، هەموو ئەرک و پابەندییە یاسایی و دەستوورییەکانی خۆی بەرامبەر بە پێشمەرگە جێبەجێ بکات، بەتایبەتی دابینکردنی چەک و تەقەمەنی و تەواوی پێداویستییە سەربازییەکان، چونکە پێشمەرگە پارێزەری ئاشتی، ئاسايش و سەقامگیریی هەموو عێراقە، لە دەستووریشدا ئەم بەشە بە تەواوەتی باس كراوە.
پاشەڕۆژی هه‌رێمى كوردستان و ته‌واوى عێراق پێکەوە گرێدراوە؛ سەرکەوتنمان یەکە، ئاڵنگاری و چارەنووسیشمان لە عێراقدا هاوبەشن. ئێمە لە هەرێمی كوردستان بە گەشبینییەوە چاوەڕێی کارکردنی هاوبەشین لەگەڵ حکوومەتی سەرۆکوەزیران عەلی زەیدی، تا لەسەر بنەمای دەستوور، ڕێزگرتنی دوولایەنە و هاوبەشیی نیشتمانیی ڕاستەقینە، ئاوەدانی و پێشكه‌وتن بۆ هەموو عێراق بێ جیاوازی مسۆگەر بکەین.
ئەم ئاراستە نيشتمانى و ئاشتیيانەی ئێمە، هاوتەریبە لەگەڵ ئەو دۆخە گەشبینە نوێیەی کە لە ناوچەکەمان و جیهاندا دروست بووە. ئێمە بە خۆشحاڵییه‌وه لە هەرێمی كوردستان پێشوازیمان لە کۆتاییهاتنی گرژی و شەڕی نێوان ئەمه‌ریکا و ئێران كرد کە لە ڕێگەی ڕێککەوتن، دیالۆگ و دیپلۆماسییەوە هیوادارین کۆتایی پێی بێت.
دووپاتى ده‌كه‌ينه‌وه كه هه‌رێمى کوردستان وەک هەمیشە به فاکتەری ئارامی و پردی متمانە لە ناوچەکەدا دەمێنێتەوە. كارمان بۆ ئه‌وه كردووه و به‌رده‌وام ده‌بين بۆ ئه‌وه‌ى عێراق و هەرێمی کوردستان بە هیچ شێوەیەك نه‌بنه بەشێک لە کێشە و لە ئاڵۆزییەکان لە ناوچەكەدا.
ئێمه ده‌مانه‌وێت و كار بۆ ئه‌وه ده‌كه‌ين هه‌ميشه به‌شێك بين له چاره‌سه‌ر و له هاريكاريى هاوبه‌ش بۆ چه‌سپاندنى ئاشتى و سه‌قامگيرى و پێشكه‌وتن و خۆشگوزه‌رانى. بۆ دۆزينەوە‌ى ڕێگه‌كانى به‌رژوه‌نديى هاوبه‌ش و پێكه‌وه‌كاركردن لەم وڵاتەدا و لەم ناوچەیەدا كە ئێمە تێیدا دەژیین.
لە کۆتاییدا، سوپاس و پێزانینی زۆرمان پێشکەش به بەڕێزان ڕاگر و مامۆستایانی ڕاهێنەر و سەرپەرشتیارانی کۆلێژی سەربازیی سێى قەڵاچوالان دەکەين کە ئەرکێکی گه‌وره و پیرۆزیان کێشا بۆ پێگەیاندنی ئەم گه‌نجانه‌ى كوردستان و سه‌رخستنى ئه‌م خولە سه‌ربازييه. به گه‌رمى ده‌ستخۆشيتان لێ ده‌كه‌م.
سەری ڕێز و نەوازش بۆ گيانى پاکی شه‌هيدانى کوردستان داده‌نوێنين کە ئەمڕۆ لە سایەی خوێنی ئەم شەهیدانە ئێمە كوردستانێكی ئازاد دەبینین و دەتوانین ئەم ڕێوڕه‌سمانه بگێڕین. ئەو شەهیدانە بەبیر دەهێنینەوە كە ژيانى خۆيان بەخت کرد تا ئەمڕۆ ئێمە لێرە بە ئارامی کۆببینەوە. سڵاو و ڕێز بۆ شه‌هيدانى زيندوو، بریندارە قارەمانەکانمان لە كوردستان لە هەر شوێنێك بن، سڵاو و ڕێز و خۆشەویستییان بۆ دەنێرین، هیوای چاکبوونەوەیان بۆ دەخوازم.
پیرۆزە لە ئێوە، پیرۆزە لە خێزانە خۆشەویستەکانتان، له ژيان و لە ئه‌رك و به‌رپرسياريه‌تيى تازه‌تاندا، هيواى سه‌ركه‌وتنتان بۆ ده‌خوازم، تەمەندرێژ بن، سه‌رفراز بن، سەركەوتوو بن، خوای گەورە لە ژیاندا پشتیوانتان بێت.
زۆر سوپاس.
