پارێزگاری دهۆک ڕێگەی ژمارەیەک گوندی کردەوە و ڕەزامەندی لەسەر نۆژەنکردنەوە و قیرتاوکردنی ژمارەیەک ڕێگەی دیکە دەربڕی.
ئەمڕۆ یەکشەممە 16ـی ئاب، د. عەلی تەتەر، پارێزگاری دهۆک، بە ئامادەبوونی د. نەوزاد عەبدوڵڵا، بەرپرسی لقی یەکی پارتی دیموکراتی کوردستان، بریندار حەیدەر، قایمقامی دهۆک و ژمارەیەک لە بەڕێوەبەرانی دامودەزگا خزمەتگوزارییەکان، ڕێگەی گوندی گەربەڕاسکێی لە دووڕیانی سیارەتیکا بە درێژاییی زیاتر لە 3 کیلۆمەتر کردەوە.
لە چوارچێوەی پڕۆژەکەدا، هەردوو ڕێگەی گوندەکانی مجلمەختێ بە درێژاییی 1.7 کیلۆمەتر و زێوکەی عەبۆ بە درێژاییی 1.1 کیلۆمەتر لە سنووری ناحیەی مانگێشکێ کۆتایییان پێهاتووە و کەوتوونەتە خزمەتی گشتییەوە.
پارێزگاری دهۆک لە کۆنگرەیەکی ڕۆژنامەوانیدا ڕایگەیاند، لەسەر ڕاسپاردەکانی سەرۆک بارزانی بۆ خزمەتکردنی زیاتری هەموو ئەو گوندە تێکۆشەر و قوربانیدەرانە، هەروەها لەسەر ڕاسپاردە بەردەوامەکانی مەسرور بارزانی، سەرۆکی حکوومەتی هەرێمی کوردستان و لەسەر داخوازییەکانی هاووڵاتییان لە ڕێگەی لقی یەکی پارتی دیموکراتی کوردستانەوە، پڕۆژە خزمەتگوزارییەکانی دروستکردنی ڕێگاوبان و دابینکردنی پێداویستییە خزمەتگوزارییەکان بۆ هاووڵاتییان لە سەرجەم ناوچەکان بەردەوامن.
هاوکات پارێزگاری دهۆک لەسەر داواکاریی هاووڵاتییانی ژمارەیەک لە گوندەکانی ناوچەکە، ڕەزامەندیی نیشاندا لەسەر نۆژەنکردنەوە و قیرتاوکردنی ئەو ڕێگەیەی کە لە دووڕیانی ئەلەکیشەوە بۆ دووڕیانی گوندی گەربەڕاسکێ و سنووری ئامێدی دەچێت.
هەروەها ڕایگەیاند کە ڕێگەکە هاتوچۆی نێوان ئیدارەی سەربەخۆی زاخۆ تا ئامێدی و ناوچەکانی دەوروبەری بەگشتی دەگرێتەوە و دەبێتە ڕێگەیەکی کورت و ئاسان بۆ هاتوچۆی سەدان گوندی ناوچەکە.
