بەڕێوەبەرایەتی گشتی حەج و عومرەی هەرێمی کوردستان، کۆچی دوایی دووەم حاجی کوردی لە وڵاتی سعوودیە ڕاگەیاند.
کاروان ستونی، گوتەبێژی فەرمی حەج و عومرەی کوردستان ڕایگەیاند: "ئەمڕۆ، حاجی (یاسین ڕەجەب خەمۆ ڕێکانی) تەمەن 70 ساڵ، کە دانیشتووی قەزای خەباتی سەر بە پارێزگای هەولێرە، لە شاری مەککە کۆچی دوایی کرد."
گوتەبێژی حەج و عومرە ئاماژەی بەوەش کرد، کە ئەم حاجییە دوای ئەوەی بەسەرکەوتوویی پرۆسەی حەج و فەریزە ئایینییەکانی تەواو کردووە، ئێوارەی ئەمڕۆ گیانی سپاردووە.
وەزارەتی ئەوقاف و کاروباری ئایینی پرسە و سەرەخۆشی خۆی ئاراستەی بنەماڵەی کۆچکردوو دەکات و ڕایگەیاندووە، کە بڕیارە دوای تەواوکردنی ڕێکارە یاساییەکان و ئەنجامدانی نوێژ لەسەر تەرمەکەی، هەر لە شاری مەککە بە خاک بسپێردرێت.
