دوای چوار ڕۆژ لە دیارنەمانی بە شێوەیەکی لەناکاو، کچێکی گەنجی خەڵکی دەڤەری دینارتێ لە سنووری پارێزگای دهۆک، بە سەلامەتی و بە زیندوویی دۆزرایەوە و بە مەبەستی وەرگرتنی چارەسەری پێویست گەیەندرایە نەخۆشخانە.
بەگوێرەی زانیارییەکانی پەیامنێری کوردستان تیڤی، ئەو کچە ناوی (شیرین یاسین)ـە و تەمەنی 24 ساڵە، دانیشتووی گوندی کادانەیە لە سنووری ناحیەی دینارتێ. ناوبراو پێش چوار ڕۆژ لەمەوبەر بە شێوەیەکی نادیار لە ماڵ دەرچووبوو و بێسەروشوێن ببوو، ئەمەش نیگەرانی و دڵەڕاوکێیەکی زۆری لای کەسوکارەکەی دروست کردبوو.
پاش هەڵمەتێکی چڕ و بەردەوامی گەڕان و پشکنین کە لەلایەن کەسوکاری و خەڵکی ناوچەکەوە ئەنجامدرا، سەرەنجام توانرا ئەو کچە بە زیندوویی بدۆزرێتەوە.
دەستبەجێ دوای دۆزینەوەی، ناوبراو ڕەوانەی نەخۆشخانەی فێرکاری کرا بۆ ئەوەی لەژێر چاودێریی پزیشکیدا بێت و پشکنینی پێویستی بۆ ئەنجام بدرێت بە مەبەستی دڵنیابوونەوە لە دۆخی تەندروستی.
