هەردی زەینەڵ، ئەو جووتیارە کوردەی دانیشتووی گوندی "قەزنەفەر"ی سەر بە ناحیەی پردێ، کە لە کۆتایی هەفتەی ڕابردووەوە چارەنووسی نادیار بوو، ئەمڕۆ پێنجشەممە ئازادکرا و گەڕایەوە نێو خێزان و کەسوکاری.
ناوبراو لە ڕۆژی هەینی ڕابردووەوە بە شێوەیەکی تەمومژاوی بێسەروشوێن ببوو، ئەمەش نیگەرانییەکی زۆری لای دانیشتووانی ناوچەکە و خێزانەکەی دروست کردبوو. دوای پێنج ڕۆژ لە نادیاریی شوێن و هۆکاری دیارنەمانی، سەرەنجام ئەمڕۆ هەواڵی گەیشتنەوەی بە ماڵەوە و ئازادبوونی ڕاگەیەندرا.
تاوەکو ئەم ساتە، چ لە لایەن دەزگا ئەمنییەکان و چ لە لایەن کەسوکارەکەیەوە، هیچ ڕوونکردنەوەیەکی فەرمی لەبارەی ئەوەی کە ئایا هەردی زەینەڵ لەلایەن چ لایەنێکەوە دەستبەسەر کراوە یان هۆکاری ڕفاندن و بێسەروشوێنبوونی چی بووە، بڵاونەکراوەتەوە.
سەرچاوە نزیکەکان لە خێزانەکەی ئاماژەیان بەوە داوە کە باری تەندروستیی ناوبراو جێگیرە و لە ئێستادا لە ناو خێزانەکەیدایە. گوندی قەزنەفەر یەکێکە لە گوندە کوردییەکانی دەوروبەری ناحیەی پردێ، کە جارجارە ڕووداوی لەو شێوەیەی تێدا تۆمار دەکرێت و دەبێتە جێی نیگەرانیی جووتیارانی ناوچەکە.
