دکتۆر دیندار زێباری، ڕێکخەری ڕاسپاردە نێودەوڵەتییەکان لە حکوومەتی هەرێمی کوردستان، لە کۆبوونەوەیەکدا لەگەڵ جەمیس حەسدو هیدو، ئەندامی پەرلەمانی کوردستان، دۆخی پێکهاتەی مەسیحی لە هەرێم و عێراق و ڕێگاکانی بەهێزکردنی پاراستنی مافەکانیانی تاوتوێ کرد.
لە دیدارەکەدا جەخت لەسەر دڵنیابوونەوە لە بەشداریی کاریگەر و یەکسانی مەسیحییەکان لە ژیانی گشتیدا کرایەوە، بە جۆرێک کە لەگەڵ بنەماکانی هاووڵاتیبوون و سەروەریی یاسادا هاوتەریب بێت.
هەردوولا ئاڵوگۆڕی بۆچوونیان کرد لەسەر گرنگیی بەهێزکردنی هاوژیانی ئاشتییانە و پاراستنی مافی هەموو پێکهاتەکان وەک بەشێکی سەرەکی لە کۆمەڵگەی کوردستان. زێباری و هیدو جەختیان لەسەر گرنگیی بەردەوامبوونی دیالۆگ و هەماهەنگیی نێوان دامەزراوەکانی حکوومەت و نوێنەرانی پێکهاتەکان کردەوە، بە مەبەستی پشتگیریکردن لە مافەکانی مرۆڤ، چەسپاندنی فرەیی و زامنکردنی بەشداریی هەموو لایەک لە کایە جیاوازەکاندا.
ئەم کۆبوونەوەیە لە چوارچێوەی هەوڵە بەردەوامەکانی حکوومەتی هەرێمی کوردستاندایە بۆ نیشاندانی پابەندییەکانی بە ڕاسپاردە نێودەوڵەتییەکان و پاراستنی فرەئایینی و فرەکولتووری لە ناوچەکەدا، کە وەک یەکێک لە خاڵە بەهێزەکانی هەرێمی کوردستان لەسەر ئاستی نێودەوڵەتی سەیر دەکرێت.
