دانا عەزیز، سەرپەرشتیاری عەلوەی هەولێر لە لێدوانێکی تایبەتدا بۆ (کوردستان تیڤی) ڕایگەیاند، سەرەڕای دەستپێکردنەوەی هەناردەکردنی تەماتەی هەرێمی کوردستان بۆ پارێزگاکانی ناوەڕاست و باشووری عێراق، بەڵام هێشتا بازگەکانی عێراق ئاستەنگ بۆ هەناردەی چەند بەربوومێکی دیکە دروست دەکەن.
سەرپەرشتیاری عەلوەی هەولێر ئاماژەی بەوە کرد، کە لە بازگەکانی دارەمان و مەخموور و چەند بازگەیەکی دیکەی سەر بە حکوومەتی فیدراڵ، ڕێگریی توند لە هەناردەکردنی پیاز و بیبەری جووتیارانی هەرێم دەکرێت و ڕێگە نادرێت ئەو بەرهەمانە بگەنە بازاڕەکانی عێراق.
دانا عەزیز ڕوونیکردەوە، کە بەپێی ڕێککەوتنی نێوان هەولێر و بەغدا، دەبێت بەرهەمە ناوخۆییەکان لە بازاڕەکانی یەکتردا ساغ بکرێنەوە. گوتیشی: "ئێمە لە هەرێمی کوردستان تەماتە و بەرهەمەکانی دیکەی عێراق وەردەگرین و هاوکاری ساغکردنەوەیان دەکەین، بەڵام لایەنی عێراقی ئامادە نییە پیاز و بیبەر لە ئێمە وەربگرێت، هەرچەندە لە بازاڕەکانی خۆیاندا ئەو دوو بەربوومە کەمن و پێویستیان پێیەتی".
لە بەشێکی دیکەی لێدوانەکەیدا، ناوبراو ئاشکرای کرد کە لە ئێستادا عێراق، بەتایبەتی لە پرسی پیازدا، تووشی کەمیی بەرهەم بووە و ناچارن لە وڵاتانی دیکەوە هاوردەی بکەن، کەچی لە هەمان کاتدا ڕێگری لە بەرهەمی ناوخۆیی کوردستان دەکەن کە بگاتە دەستی بەکاربەرانی عێراق.
