ڕێبەر ئەحمەد، وەزیری ناوخۆی حکوومەتی هەرێمی کوردستان، ئەمڕۆ دووشەممە 6ی تەممووزی 2026، لە شاری بەغداد لەگەڵ باسم بەدری، سەرۆکی نوێی دەزگای ئاسایشی نیشتمانیی عێراق کۆبووەوە.
ئەم دیدارە لە چوارچێوەی سەردانی شاندێکی باڵای ئەمنیی هەرێمی کوردستان دێت بۆ پایتەخت بە مەبەستی پەرەپێدانی پەیوەندییەکان و یەکخستنی پلانە ئەمنییەکان.
لە سەرەتای کۆبوونەوەکەدا، وەزیری ناوخۆی هەرێم پیرۆزبایی دەستبەکاربوونی لە باسم بەدری کرد بەبۆنەی وەرگرتنی پۆستە نوێیەکەی و هیوای سەرکەوتنی بۆ خواست لە ڕاپەڕاندنی ئەرکە نیشتمانییەکانیدا. پاشان هەردوولا باسیان لە ڕێگاکانی بەهێزکردنی هەماهەنگیی هاوبەش و فراوانکردنی ئاستی هاوکاریی نێوان دەزگا ئەمنییەکانی حکوومەتی فیدراڵ و حکوومەتی هەرێمی کوردستان کرد.
لە بەشێکی تری گفتوگۆکاندا، جەخت لەسەر گرنگیی یەکخستنی هەوڵەکان کرایەوە بۆ ڕووبەڕووبوونەوەی ئەو ئاڵەنگارییە ئەمنییە هاوبەشانەی کە لە ئێستادا ڕووبەڕووی ناوچە جیاجیاکانی وڵات دەبنەوە. هەردوولا کۆک بوون لەسەر ئەوەی کە هەماهەنگیی بەردەوامی نێوان دەزگا هەواڵگری و ئەمنییەکان، مەرجێکی سەرەکییە بۆ پاراستنی سەقامگیری و دابینکردنی ژینگەیەکی ئارام بۆ هاووڵاتیان لە ساڵی 2026دا.
