عامر نووری، گوتەبێژی پۆلیسی کەرکووک لە لێدوانێکی تایبەتدا بۆ (کوردستان تیڤی) نوێترین وردەکاریی دەربارەی ڕفاندنی هاووڵاتییەکی کورد لە سنووری پارێزگاکە ئاشکرا کرد و ڕایگەیاند، کە هێزە ئەمنییەکان توانیویانە ئۆتۆمبێلی ئەو هاووڵاتییە لە دووریی چەند کیلۆمەترێک لە شوێنی ڕووداوەکە بدۆزنەوە.
بەپێی وتەی گوتەبێژی پۆلیس، ڕفاندنی ئەم هاووڵاتییە کە پیشەی جووتیارە، وەک "کارێکی تیرۆریستی" هەژمار ناکرێت و لێکۆڵینەوە سەرەتاییەکان ئاماژە بۆ ئەوە دەکەن کە ڕووداوەکە ڕەهەندێکی تری هەیە. عامر نووری دڵنیایی دایە هاووڵاتییان و کەسوکاری ڕفێندراوەکە کە تیمەکانیان لەوپەڕی ئامادەباشیدان و وتی: "دڵنیان بە زووترین کات دەیدۆزنەوە."
هەرچەندە تاوەکو ئێستا شوێنی وردی جووتیارەکە و چارەنووسی نادیارە و هیچ شوێنەوارێکی خۆی لە ناو ئۆتۆمبێلەکەیدا نەدۆزراوەتەوە، بەڵام پۆلیسی کەرکووک جەختی کردەوە کە پڕۆسەی گەڕان و بەدواداچوونی مەیدانی بەردەوامە. هێزە ئەمنییەکان لە ئێستادا بە وردی کێوماڵی ئەو ناوچەیە دەکەن کە ئۆتۆمبێلەکەی تێدا دۆزراوەتەوە تاوەکو هەر سەرەداوێک بۆ دەستنیشانکردنی شوێنی ڕفێندراوەکە و دەستگیرکردنی ئەنجامدەرانی تاوانەکە بەدەست بهێنن.
ئەم ڕووداوە لە کاتێکدایە کە ناوە ناوە ناوچە جیاجیاکانی کەرکووک شایەدی ڕفاندن و پەلاماردانی جووتیاران دەبن، کە زۆرجار بەهۆی ململانێی زەوی و زار یان مەبەستی تاوانکارییەوە ئەنجام دەدرێن. پۆلیسی کەرکووک بەڵێنیداوە لەگەڵ هەر پێشهاتێکی نوێ لەبارەی ئەم کەیسەوە، ڕای گشتی ئاگادار بکاتەوە.
