هاتوچۆی سۆران ڕایگەیاند، لە ڕێگای هامڵتۆن بارهەڵگرێک وەرگەڕا و کەوتە نێو ڕووبارەوە، بارهەڵگرەکە سێ سەرنشینی تێدابووە و یەکێکیان بەهۆی سەختی برینەکەیەوە گیانی لەدەست داوە.
ئەمڕۆ شەممە 13ـی حوزەیران، بەڕێوەبەرایەتیی هاتوچۆی سۆران ڕایگەیاند، ئۆتۆمبێلێکی بارهەڵگری جۆری (ئەکترۆز ترێلە) لە ڕێگای هامڵتۆن نزیک گوند ڕەزان لە ڕێڕەوی خۆی لایداوە و وەرگەڕاوە، دواتر بارهەڵگرەکە بە 3 سەرنشینەوە کەوتووەتە نێو ڕووبارەوە.
کاروان میراودەلی، بەڕێوەبەری بەرگریی شارستانیی سۆران بە لێزان ژیاری پەیامنێری (کوردستان تیڤی) ڕاگەیاند، دوای گەڕان و پشکنینی خێرای تیمەکان توانرا دوو سەرنشین لە ئاوەکەدا دەربهێنرێنەوە و ڕزگار بکرێن، بەڵام سەرنشینی سێیەم دوای گەیاندنی بە نەخۆشخانە، بەهۆی سەختیی برینەکەیەوە گیانی لەدەست داوە.
