پاشنیوەڕۆی ئەمڕۆ دووشەممە 27ی تەممووزی 2026، مەسرور بارزانی، سەرۆکی حکوومەتی هەرێمی کوردستان، پێشوازی لە "ئیوون گیوو شیم"، کونسوڵی گشتیی نوێی کۆماری کۆریای باشوور لە هەرێمی کوردستان کرد، بە مەبەستی پیرۆزبایی و دەستبەکاربوونی لە ئەرکە نوێیەکەیدا.
لە دیدارەکەدا، سەرۆکی حکوومەت بە گەرمی پیرۆزبایی دەستبەکاربوونی لە کونسوڵی نوێی کۆریای باشوور کرد و هیوای سەرکەوتنی لە ڕاپەڕاندنی ئەرکە دیپلۆماسییەکانیدا بۆ خواست. مەسرور بارزانی پشتیوانیی تەواوی دامەزراوەکانی حکوومەتی هەرێمی کوردستانی بۆ کونسوڵخانەی کۆریا دووپات کردەوە، بە مەبەستی کارئاسانی و سەرخستنی کارەکانیان لە هەرێمدا.
لای خۆیەوە، "ئیوون گیوو شیم" خۆشحاڵیی خۆی بە دەستبەکاربوونی وەک کونسوڵی گشتی لە هەرێمی کوردستان نیشاندا. کونسوڵی نوێی کۆریای باشوور جەختی لە گرنگیی بەهێزکردنی پەیوەندییە مێژووییەکانی نێوان وڵاتەکەی و هەرێمی کوردستان کردەوە و ئاماژەی بەوە دا کە کار دەکەن بۆ بەرەوپێشبردنی هاوکارییە دوولایەنەکان لە بوارە جۆراوجۆرەکاندا، بەتایبەتی لە کەرتە خزمەتگوزاری و تەکنەلۆژییەکاندا.
کۆریای باشوور یەکێکە لەو وڵاتانەی کە پەیوەندییەکی دۆستانەی لەمێژینەی لەگەڵ هەرێمی کوردستان هەیە و لە ڕێگەی تیمەکانی "زەیتون" و پڕۆژە جیاوازەکانی ئاژانسی "کۆیکا"وە، دەورێکی بەرچاوی لە ئاوەدانکردنەوە و گەشەپێدانی مرۆیی لە هەرێمدا گێڕاوە. ئەم دیدارە نوێیەش وەک هەنگاوێک دەبینرێت بۆ قووڵکردنەوەی زیاتری ئەو هەماهەنگییە دیپلۆماسی و ئابوورییانە.
