ئەمشەو دووشەممە بە مووشەك هێرشكرایە سەر كەمپی سوورداش كە تایبەتە بە کۆمەڵەی زەحمەتکێشانی کوردستان و بەهۆیەوە دوو كەس بریندار بووە.
ئەمجەد حوسێن پەناهی ئەندامی سەرکردایەتی کۆمەڵەی زەحمەتکێشانی کوردستان رایگەیاند: کۆماری ئیسلامی ئێران جارێکی دیکە هێرشی کردە سەر مەقەرەکانی کۆمەڵەی زەحمەتکێشانی کوردستان.
راشیگەیاند: لە درێژەی هێرشەکانی کۆماری ئیسلامی بۆ سەر کۆمەڵە ئەمشەو دووشەممە کاتژمێر 10:00 بە چوار مووشەک هێرشکرایە سەر مەقەرەکانی کۆمەڵە لە سوورداش.
هەروەها رایگەیاند: لە ئەنجامی هێرشەكە دوو هاووڵاتی بریندار بوون.
ئەمجەد حوسێن پەناهی ئاماژەی بەوەش دا: کۆماری ئیسلامیی ئێران لە ماوەی دەستپێکی شەڕ لەگەڵ ئەمریکا و ئیسرائیل هەتا ئێستا، بە زیاتر لە 77 مووشەک و دڕۆن بنکە و بارەگاکانی کۆمەڵەی کردووەتە ئامانج.
