وەزارەتی شارەوانی و گەشتوگوزار ڕایگەیاند، لە چوارچێوەی پڕۆسەی گۆڕینی کارتی زەوی بۆ تاپۆ، وێنەی تۆماری 327 کارتی دیکەی زەوی لە کەرتی 92ـی شاوێس لە سنووری پارێزگای هەولێر تەواو کرا و ئامادەی ڕادەستکردنەوەن.
ئەمڕۆ دووشەممە 12ـی تشرینی یەکەمی 2026، وەزارەتی شارەوانی و گەشتوگوزاری حکوومەتی هەرێمی کوردستان لە ڕاگەیەندراوێکدا بڵاوی کردەوە: لە چوارچێوەی پڕۆسەی تاپۆکردنی زەوییە کارتەکانی سنووری پارێزگای هەولێر، لە قۆناغێکی نوێدا (327) کارتی دیکەی زەوی وێنەی تۆماریان تەواو کراوە و ئامادەن.
لە ڕاگەیەندراوەکەدا هاتووە: لە درێژەی کارکردنی یەکەی گۆڕینی کارتی زەوی بۆ تاپۆ لە وەزارەتی شارەوانی و گەشتوگوزار، بەشێک لە زەوییە کارتەکانی (کەرتی 92ـی شاوێس) لە سنووری سەرۆکایەتیی شارەوانیی شاوێس، مامەڵەی وێنەی تۆمارەکانیان تەواو بووە و ئێستا ئامادەن بۆ ئەوەی بدرێنەوە بە خاوەنەکانیان.
