بەڕێوەبەرایەتیی هاتووچۆی هەولێر ڕایگەیاند کە بەیانی ڕۆژی سێشەممە 25ی ئابی 2025، لە کاتژمێر 8:00ی بەیانییەوە سەرجەم ئەو شەقامانەی دەچنەوە ناو سەنتەری شار و بەردەم قەڵای هەولێر بە ڕووی ئۆتۆمبێلەکاندا دادەخرێن. ئەم بڕیارە بە مەبەستی ڕێکخستنی هاتووچۆ و ئاسانکارییە بۆ ئەو هاووڵاتییانەی بەشداری لە یادی لەدایکبوونی پێغەمبەر (د.خ) دەکەن.
بەپێی ڕاگەیەندراوی هاتووچۆ، لەو ماوەیەدا شەقامەکان تەنیا بۆ پیادەڕۆ دەبن و تاوەکو کۆتاییهاتنی یادەکە و چۆڵبوونی ناوچەکە لە قەرەباڵغی، ڕێگە بە هاتووچۆی هیچ جۆرە ئۆتۆمبێلێک نادرێت. لایەنە پەیوەندیدارەکان داوا لە شۆفێران دەکەن ڕێگەی جێگرەوە بەکاربهێنن و پابەندی ڕێنماییەکان بن تاوەکو جەنجاڵی لە ناوشاردا دروست نەبێت.
یادی مەولوود یان لەدایکبوونی پێغەمبەر، یەکێکە لە بۆنە ئایینییە گەورەکان لە هەرێمی کوردستان و بەتایبەتی لە شاری هەولێر کە بە کلتوور و شێوازی تایبەت یادی دەکرێتەوە. ساڵانە هەزاران کەس لە دەوروبەری قەڵای مێژوویی هەولێر کۆدەبنەوە و بە دابەشکردنی شیرینی و خوێندنەوەی مەولوودنامە و قەسیدە ئایینییەکان ئەو ڕۆژە بەرز ڕادەگرن. حکوومەتی هەرێمی کوردستانیش بەم بۆنەیەوە پشووی فەرمی لە سەرجەم دامودەزگاکاندا ڕادەگەیەنێت و ڕێکاری ئەمنی و خزمەتگوزاریی توند بۆ پاراستنی گیانی بەشداربووان دەگیرێتە بەر.
