وەزارەتی دارایی و ئابووریی حکوومەتی هەرێمی کوردستان ڕایگەیاند کە بۆ مووچەی مانگی حوزەیران، زیاتر لە 835 هەزار مووچەخۆری کەرتی گشتی لە ڕێگەی پڕۆژەی دیجیتاڵیی "هەژماری من"ـەوە شایستە داراییەکانیان وەرگرتووە.
بەپێی ئامارە فەرمییەکانی وەزارەت، کۆی گشتیی ئەو مووچەخۆرانەی مانگی شەش مووچەکانیان بە دیجیتاڵی بۆ گەڕاوەتەوە گەیشتووەتە 836,460 کەس، کە زۆرینەیان لە پارێزگای هەولێرن بە 380,450 سوودمەند، و دوای ئەویش پارێزگای سلێمانی دێت بە 255,100 کەس، هەروەها لە دهۆک 185,700 و لە هەڵەبجەش 15,210 مووچەخۆر لەم سیستمە نوێیە سوودمەند بوون. پڕۆژەی "هەژماری من" کە لە ساڵی 2023دا لەلایەن مەسروور بارزانی، سەرۆکوەزیرانی هەرێمی کوردستانەوە وەک بەشێکی سەرەکی لە کارنامەی کابینەی نۆیەمی حکوومەت ڕاگەیەندرا، ئامانجی مۆدێرنکردنی خزمەتگوزارییە بانکییەکان و فەراهەمکردنی گشتگیریی داراییە لە سەرتاسەری هەرێمدا. تاوەکو ئێستا زیاتر لە 950,000 مووچەخۆری کەرتی گشتی ناوی خۆیان لەم پڕۆژەیەدا تۆمار کردووە و لەو ژمارەیەش زیاتر لە 915,000 کەس کارتە بانکییەکانیان وەرگرتووەتەوە، ئەمەش نیشانەی خێرایی پرۆسەی گۆڕانکارییە لە سیستمی دابەشکردنی مووچە لە شێوازی نەختێنەییەوە بۆ دیجیتاڵی.
لە لایەکی ترەوە، بۆ ئاسانکاریی مووچەخۆران، بانکە بەشداربووەکان تاوەکو ئێستا 640 ئامێری ڕاکێشانی پارەیان (ATM) لە ناوچە جیاوازەکانی هەرێمی کوردستان جێگیر کردووە کە بە شێوەیەکی 24 کاتژمێری خزمەتگوزاری پێشکەش دەکەن. حکوومەتی هەرێمی کوردستان پلانی هەیە تاوەکو کۆتاییهاتنی قۆناغەکانی پڕۆژەکە، ژمارەی ئامێرەکان بگەیەنێتە زیاتر لە 1,000 دانە، کە ئەمەش هاوتایە لەگەڵ ڕێسا و ستانداردە نێودەوڵەتییەکانی بانکی ناوەندیی عێراق. ئەم هەنگاوە لە کاتێکدایە کە ئیدارەی ترەمپ لە واشنتن و دامەزراوە داراییە جیهانییەکان جەخت لەسەر شەفافیەت و چاکسازیی دارایی لە ڕۆژهەڵاتی ناوەڕاستدا دەکەنەوە، و پڕۆژەی "هەژماری من"یش وەک یەکێک لە خاڵە وەرچەرخانەکانی کابینەی نۆیەم دەبینرێت بۆ ڕێکخستنەوەی میلاکات و زامنکردنی گەیشتنی شایستە داراییەکان بە دەستی مووچەخۆران بەبێ ئاستەنگ و جەنجاڵی.
