بەڕێوەبەرایەتیی گشتیی کارەبای سۆران، ئاگادارییەکی بۆ هاوبەشانی کارەبا لە سنوورەکە بڵاوکردەوە و ڕایگەیاند، کە بە مەبەستی کارئاسانی بۆ هاوڵاتیان تاوەکو بتوانن لە بڕیاری داشکاندنی 50%ی قەرزی کۆن سوودمەند بن، کاتی دەوامی بەشی فرۆشتنی وزەیان درێژ کردووەتەوە.
بەپێی ڕاگەیەندراوێکی فەرمیی بەڕێوەبەرایەتییەکە، لەمەودوا فەرمانبەرانی بەشی فرۆشتنی وزە تاوەکو کاتژمێر 3:00ی پاشنیوەڕۆ لەسەر کارەکانیان دەمێننەوە. ئەم هەنگاوە ئامانج لێی ڕەخساندنی دەرفەتی زیاترە بۆ ئەو هاوبەشانەی کە دەیانەوێت قەرزە کەڵەکەبووەکانی کارەبایان (ئەوانەی پێش دەستپێکردنی پڕۆژەی ڕووناکی بوون) پاکتاو بکەن و نیوەی بڕی قەرزەکەیان بۆ خۆش بکرێت.
کارەبای سۆران ئاماژەی بەوە کردووە، کە ئەم داشکاندنە بۆ ماوەیەکی دیاریکراو بەردەوام دەبێت و دوا وادە بۆ سوودمەندبوون لێی بریتییە لە ڕێکەوتی 10 / 9 / 2026. داواش لە هاوڵاتیان دەکرێت پێش ئەو وادەیە سەردانی فەرمانگەکان بکەن بۆ ڕاییکردنی مامەڵەکانیان.
جگە لە سەردانی مەیدانی، بەڕێوەبەرایەتییەکە ڕێگەیەکی ئاسانتری بۆ هاوڵاتیان خستووەتە ڕوو؛ بەشداربووان دەتوانن لە ڕێگەی ئەپڵیکەیشنی (E-Psula) یان "ئی-پسوولە"وە بە شێوەیەکی دیجیتاڵیی قەرزەکانی پێش پڕۆژەی ڕووناکی بدەن و بە هەمان شێوە لە داشکاندنی 50% سوودمەند بن.
ئەم بڕیارەی کارەبای سۆران لە چوارچێوەی هەوڵەکانی وەزارەتی کارەبای حکوومەتی هەرێمی کوردستاندایە بۆ ڕێکخستنەوەی کۆکردنەوەی داهات و سووککردنی بارگرانیی دارایی لەسەر شانی هاوڵاتیان، هاوکات لەگەڵ بەردەوامیی هەوڵەکان بۆ دابینکردنی کارەبای 24 کاتژمێری لە ڕێگەی پڕۆژەی ڕووناکییەوە.
