بەڕێوەبەرایەتی پۆلیسی پارێزگای هەولێر دوو تۆمەتباری دەستگیر كرد بەهۆی ئەوەی لە دوو مزگەوتی جیاوازی شاری هەولێردا كاری دزییان ئەنجامداوە.
پۆلیسی هەولێر رایگەیاند: تیمەکانی بەشی نەهێشتنی تاوان لە پۆلیسی پارێزگای هەولێر لە چالاکییەکدا دوو تۆمەتباریان دەستگیر كرد بەهۆی ئەوەی لە دوو مزگەوتی شاری هەولێر کردەوەی دزیکردنیان ئەنجامدابوو.
دوای پێگەیشتنی زانیاری و تۆمارکردنی سکاڵا، تیمەکانی بەشی نەهێشتنی تاوان دەستبەجێ دەستیان بە لێکۆڵینەوە و بەدواداچوونی ورد کرد، لە ماوەیەکی پێوانەیی کورتدا توانرا هەردوو تۆمەتبارەکە دەستنیشان و دەستگیر بکرێن.
تۆمەتباری یەکەم: لەناو حەوت ئۆتۆمبێل لە گەراجی مزگەوتی جەلیل خەیات دزی کردبوو.
تۆمەتباری دووەم: لەناو مزگەوتێکی شاری هەولێر مۆبايلی دزی بوو.
پۆلیسی هەولێر ئاماژەی بەوەش دا كە بە بڕیاری دادوەری لێکۆڵینەوە، هەردوو تۆمەتبارەكە ڕاگیراون و پەڕاوی یاساییان بۆ ڕێک خراوە.
