ئەمڕۆ سێشەممە، 21ـی تەممووزی، لە چوارچێوەی هەڵمەتە بەردەوامەکانی قایمقامییەتی ناوەندیی هەولێر بۆ ڕێگریکردن لە هاوردەکردن و بڵاوبوونەوەی کاڵا و کەلوپەلی نایاسایی و زیانبەخش، نزیکەی 30 هەزار ڤەیپ (جگەرەی ئەلیکترۆنی) لە شاری هەولێر لەناو بران.
ئەم کەلوپەلانە لە ئەنجامی بەدواداچوون و پشکنینە مەیدانییەکانی لیژنە هاوبەشەکانی قایمقامییەت لە بازاڕ و شوێنە گشتییەکاندا دەست بەسەردا گیرابوون، چونکە بە شێوەیەکی قاچاغ هێنرابوونە ناو هەرێمی کوردستان و شاری هەولێر، مەرجە تەندروستییەکانیان تێدا نەبوو و بەکارهێنانیان مەترسیی بۆ سەر تەندروستیی هاووڵاتییان دروست دەکرد.
لایەنە پەیوەندیدارەکان بەردەوام دەبن لە چاودێریکردنی بازاڕەکان و ڕێکاری توند بەرامبەر هەر سەرپێچییەک دەگرنەبەر کە سەلامەتیی هاووڵاتییان بخاتە مەترسییەوە. پرۆسەی لەناو بردنەکەش بە پێی ڕێنماییە فەرمییەکان و لە شوێنێکی تایبەتدا ئەنجام درا.
