لە سنووری قەزای سیدەکان، بەهۆی وەرگەڕانی تراکتۆرەکەیەوە لە کاتی کارکردندا، جووتیارێک بە سەختی بریندار بوو و بەهۆی ناجێگیریی باری تەندروستییەوە، ڕەوانەی نەخۆشخانەی فریاکەوتنی سۆران کرا.
ئەمڕۆ سێشەممە، 14ی تەممووزی 2026، لە گوندی "پەنجاڕ"ی سنووری قەزای سیدەکان، ڕووداوێکی وەرگەڕانی تراکتۆر ڕوویدا و لە ئەنجامدا شۆفێرەکەی بە سەختی بریندار بوو.
بەگوێرەی زانیارییەکانی مەهدی داود پەیامنێری (کوردستان تیڤی) شۆفێرەکە ناوی (شوان نەبی)ـیە، دانیشتووی گوندی پەنجاڕە و پیشەی جووتیارە. لە کاتی کارکردنی لە کێڵگەیەکی کشتوکاڵیدا، تراکتۆرەکەی وەرگەڕاوە و بەهۆیەوە کەوتووەتە ژێر ئامێرە کشتوکاڵییەکە.
سەرچاوەیەک لە نەخۆشخانەی فریاکەوتنی سۆران بە پەیامنێری کوردستان تیڤی ڕاگەیاند: بەهۆی توندیی ڕووداوەکەوە، شۆفێرەکە بە سەختی بریندار بووە و باری تەندروستیی ناجێگیرە. بریندارەکە بە مەبەستی وەرگرتنی چارەسەری بەپەلە ڕەوانەی نەخۆشخانەکەمان کراوە.
