ئەمڕۆ سێشەممە و لە ماوەی چەند كاتژمێرێكدا لە دۆڵی ئالانە لە سنووری ئیدارەی سۆران، بارەگاکانی کۆمەڵەی زەحمەتكێشانی كوردستان سێ جار بۆردومان کران، لە ماوەی رابردووشدا زیاتر لە 100 هێرش کراوەتە سەر بارەگاکانی کۆمەڵە.
وردەکاریی هێرشەکان و کاتی تەقینەوەکان
بەپێی زانیارییە مەیدانییەکان، یەکەمین هێرشی توندی ئەمڕۆ سێشەممە لە کاتژمێر 1:20ی پاش نیوەڕۆ تۆمار کرا، کاتێک زنجیرەیەک مووشەک ئۆردوگای کۆمەڵەی زەحمەتکێشانی کوردستانیان لە دۆڵی ئالانە پێکاوە. تەنها ماوەیەکی کەم دوای ئەمە، دوو شەپۆڵی دیکەی بۆردومان هەمان ناوچەیان گرتەوە، بەپێی گوتەی بەرپرسانی ئەو حزبە، سێیەمین هێرشی مووشەکی لە ئێستادا و لە کاتژمێرەکانی ئێوارەدا ئەنجام دراوە.
ئەمجەد حوسێن پەنایی ئەندامی سەرکردایەتیی کۆمەڵەی زەحمەتکێشان، لە لێدوانێکی تایبەتدا بە (کوردستان تیڤی) ڕایگەیاند: سەرەڕای توندیی بۆردومانەکان، هیچ زیانێکی گیانی لە ناو ڕیزەکانیاندا نییە.
پەنایی ئاماژەی بەوە کرد کە بەهۆی ئامادەباشی پێشوەختە و جێبەجێکردنی ڕێوشوێنی توندی پاراستن، هێزەکانیان توانیویانە خۆیان لەو گورزە مووشەکییانە بپارێزن، هەرچەندە زیانی ماددی بەرچاو بە ئۆردوگاکان گەیشتووە.
زیاتر لە 100 هێرش
بەپێی ئامارە فەرمییەکانی کۆمەڵەی زەحمەتكێشان، لەوەتەی دەستپێکردنی شەڕی ئێستا لە ڕۆژهەڵاتی ناوەڕاست، ژمارەی ئەو مووشەک و درۆنانەی کە کۆماری ئیسلامی ئێران ئاڕاستەی بارەگاکانی کۆمەڵەی کردوون، بەربەستی 102 هێرشی بڕیوە.
شیکاریی سیاسی و سەربازی
تاران دەیەوێت بیسەلمێنێت کە سەرەڕای هەوڵە دیپلۆماسییەکان بۆ ئاگربەست لەگەڵ واشنتۆن، هێشتا دەستی کراوەیە لە لێدانی هەر ئامانجێک کە بە هەڕەشەی بۆ سەر ئاسایشی نیشتمانیی خۆی دەزانێت.
دۆڵی ئالانە کە دەکەوێتە سنووری ئیدارەی سەربەخۆی سۆران، بەهۆی هەڵکەوتە جوگرافییەوە بووەتە هێلی یەکەمی ئەم ڕووبەڕووبوونەوەیە. لە ئێستادا ئاسمانی ناوچەکە لەژێر چاودێریی بەردەوامدایە و دانیشتووانی ناوچە سنوورییەکان لە دۆخێکی دڵەڕاوکێی بەردەوامدا دەژین، لە کاتێکدا کە هیچ ئاسۆیەکی ڕوون بۆ ڕاگرتنی ئەم بۆردومانە یەک لە دوای یەکانە لە ئارادا نییە.
