مەسرور بارزانی، سەرۆکی حکوومەتی هەرێمی کوردستان، ئەمڕۆ بە فەرمی پڕۆژەی پارکی (باخچە هەڵواسراوەکانی بابل)ی لە قەزای عەنکاوە کردەوە. لە کاتی کردنەوەی پارکەکەدا، سەرۆک وەزیران جەختی لەسەر گرنگیی ئەم جۆرە پڕۆژانە کردەوە بۆ نیشاندانی سیمای شارستانی و کلتووریی هەرێمەکە.
مەسرور بارزانی لە وتەیەکدا ڕایگەیاند: "ئەم پارکە تەنها شوێنێکی سەوزایی و گەشتیاری نییە، بەڵکو ئاماژەیەکی ڕوونە بۆ ڕەسەنایەتی و مێژووی قووڵی پێکەوەژیان لە ناوچەکەدا." ئاماژەی بەوەش کرد کە پڕۆژەکە سیمایەکی جوانتر و شارستانیتر دەبەخشێتە قەزای عەنکاوە و گرنگییەکی گەورەی دەبێت بۆ دانیشتووان و گەشتیارانی ناوچەکە.
یەکێک لە تایبەتمەندییە دیارەکانی ئەم پارکە، بوونی گەورەترین ئاڵای کوردستانە، کە سەرۆکی حکوومەت وەک "نیشانەی سەرکەوتن و شکۆ" وەسفی کرد. وتیشی: "هەموو ئەوەی لەسەر شانمانە ئەوەیە کە بڵێین بەردەوام دەبین لە خزمەتکردنی هەرێمی کوردستان و دابینکردنی باشترین پڕۆژە بۆ هاووڵاتیانمان."
لە کۆتایی مەراسیمەکەدا، مەسرور بارزانی دەستخۆشی لە سەرۆکی شارەوانی هەولێر و سەرۆکی شارەوانی عەنکاوە کرد بۆ هەوڵەکانیان لە جێبەجێکردن و سەرپەرشتیکردنی ئەم پڕۆژە ناوازەیە، کە بە یەکێک لە پارکی هەرە جوان و سەرنجڕاکێشەکانی پارێزگای هەولێر هەژمار دەکرێت.
