مەسرور بارزانی، سەرۆکی حکوومەتی هەرێمی کوردستان، لە لێدوانێکی نوێدا تیشکی خستە سەر چەند پرسێکی گرنگی سیاسی، ئەمنی و میدیایی و ڕایگەیاند کە حکوومەت پەرۆشی ئەوەیە لە زووترین کاتدا پەرلەمانی کوردستان کارا بکرێتەوە.
سەبارەت بە دۆخی سیاسیی ناوخۆ، سەرۆکی حکوومەت جەختی لە گرنگیی دامەزراوەی پەرلەمان کردەوە و ئاماژەی بەوە دا کە کاراکردنەوەی پەرلەمان هەنگاوێکی زەرورە بۆ بەردەوامبوونی پڕۆسەی دیموکراسی و یاسادانان لە هەرێمی کوردستاندا.
مەسرور بارزانی هەواڵێکی گرنگی سەبارەت بە پاراستنی کەرتی وزە ڕاگەیاند و گوتی: "حکوومەتی فیدراڵیی عێراق بەڵێنی پێداوین کە سیستمی بەرگریی پێویست بۆ کێڵگە نەوتییەکان و ئەو کۆمپانیا بیانییانە دابین بکات کە لە هەرێمی کوردستان کار دەکەن." ئەم هەنگاوە وەک گەرەنتییەک دەبینرێت بۆ پاراستنی ژێرخانی ئابووریی هەرێم لە بەرامبەر هەر هەڕەشەیەکی ئەگەری.
سەبارەت بە دۆخی ڕۆژنامەنووسان و ئازادیی ڕادەربڕین، مەسرور بارزانی پەیامێکی ڕوونی ئاراستەی لایەنە پەیوەندیدارەکان و میدیاکاران کرد و ڕایگەیاند: "پەیامی من ئەوەیە کە دەبێت ڕێز لە ڕۆژنامەنووسان بگیرێت و مافەکانیان پارێزراو بێت." هاوکات، جەختی لەوەش
کردەوە کە پێویستە ڕۆژنامەنووسانیش لە بەرامبەردا بە شێوەیەکی "پیشەییانە" کارەکانی خۆیان بکەن و پابەندی بنەماکانی ڕۆژنامەگەری بن.
