مەسرور بارزانی سەرۆکی حکوومەتی هەرێمی کوردستان، لە پەیامێکدا پیرۆزبایی لە "تۆم باراک" کرد بەبۆنەی دەستبەکاربوونی وەک نێردەی تایبەتی سەرۆکایەتیی ئەمریکا بۆ کاروباری عێراق و سووریا.
سەرۆکی حکوومەت هیوای سەرکەوتنی لە ئەرکە نوێیەکەیدا بۆ خواست و ڕایگەیاند: "بە پەرۆشەوە چاوەڕوانی کارکردنی نزیک و هەماهەنگی زیاترم لەگەڵتان، بە مەبەستی برەودان و پتەوکردنی پەیوەندییە مێژووییەکانی نێوان هەرێمی کوردستان و ئەمریکا."
رۆژی یەكشەممەی رابردوو دۆناڵد ترەمپ سەرۆكی ئەمریكا بەفەرمی تۆم باراكی بە نێردەی تایبەتی سەرۆكایەتی ئەمریكا لە هەردوو وڵاتی سووریا و عێراق دەستنیشان كرد.
دۆناڵد ترەمپ سەرۆكی ئەمریكا لە پۆستێكدا لە تۆڕی كۆمەڵایەتی (ترووس سۆشیاڵ) نووسیوبووی: خۆشحاڵم رایدەگەیەنم كە تۆم باراك باڵیۆزی ئەمریكا لە توركیا لە ماوەكانی رابردوودا وەك نێردەی تایبەتی سەرۆكایەتی ئەمریكا لە سووریا كاری نایابی كردووە.
هەروەها نووسیبووی: لەمەودوا تۆم باراك وەك نێردەی تایبەتی سەرۆكایەتی ئەمریكا بۆ عێراقیش دەستبەكار دەبێت.
سەرۆكی ئەمریكا ئاماژەی بەوەشدابوو كە: سەرەڕای ئەو پۆستە نوێیە، تۆم باراك وەك باڵیۆز لە توركیا دەمێنێتەوە و لەلایەن وەزارەتی دەرەوەی ئەمریكاوە پشتیوانی تەواوە دەكرێت.
