مەسرور بارزانی، سەرۆکی حکوومەتی هەرێمی کوردستان، لە پەیامێکی سەرەخۆشیدا هاوخەمیی قووڵی خۆی بۆ کۆچی دوایی سیاسەتمەداری ناسراوی کورد، خوالێخۆشبوو مەهدی زانا ئاراستەی بنەماڵە و کەسوکاری کرد.
لە پەیامەکەیدا، سەرۆکی حکوومەتی هەرێمی کوردستان ڕێز و حورمەتی بۆ بنەماڵە بەڕێزەکەیان دووپاتکردەوە و بەتایبەتی سەرەخۆشی لە "خوشکی هێژا خاتوو لەیلا زانا" کرد. مەسرور بارزانی ئاماژەی بەوە کرد کە مەهدی زانا یەکێک بوو لە تێکۆشەرە ناسراوەکانی کورد و تەمەنێکی درێژی لە کاروانی خەبات و تێکۆشانی گەلی کورددا بەسەر برد.
سەرۆکی حکومەت لە کۆتایی پەیامەکەیدا، داوای لە خودای مەزن کرد گیانی خوالێخۆشبوو بە بەزەیی خۆی شاد بکات و جێگەی بەهەشتی بەرین بێت، هیوای سەبووریشی بۆ بنەماڵە و دۆستانی خواست.
