مەسرور بارزانی سەرۆکی حکوومەتی هەرێمی کوردستان لەگەڵ محەممەد ئەلحەلبووسی، سەرۆکی حزبی تەقەدوم کۆبووەوە؛ لەم دیدارەدا جەخت لەسەر "هاوپەیمانییەکی پتەو" کرایەوە بۆ چەسپاندنی مافەکان و تێپەڕاندنی ئەو ئاستەنگە سیاسییانەی کە بەرۆکی پڕۆسەی حوکمڕانییان لە عێراق گرتووە.
لەم دیدارەدا کە ئێوارەی ئەمڕۆ شەممە 5/23 بەڕێوەچوو، محەممەد ئەلحەلبووسی، سەرۆکی حزبی تەقەدوم، خۆشحاڵیی قووڵی خۆی بە سەردانەکەی سەرۆکی حکومەتی هەرێمی کوردستان بۆ بەغدا دەربڕی و بە "هەنگاوێکی مێژوویی و پێویست" بۆ لێکنزیککردنەوەی دیدگاکان وەسفی کرد. ناوبراو بە ڕاشکاوی پشتیوانیی خۆی و پارتەکەی بۆ مافە دەستوورییەکانی خەڵکی کوردستان دووپات کردەوە و ڕایگەیاند کە پێویستە کێشەکانی نێوان هەولێر و بەغدا لەسەر بنەمای دەستوور و بە شێوەیەکی دادپەروەرانە چارەسەر بکرێن.
لای خۆیەوە، مەسرور بارزانی سوپاسی هەڵوێستی ڕاشکاو و پشتیوانیی سەرۆکی حزبی تەقەدومی کرد و جەختی لە گرنگیی بەهێزکردنی هاریکاری و هاوئاهەنگیی نێوان هێز و لایەنە سیاسییەکان کردەوە. سەرۆکی حکومەت ئاماژەی بەوە کرد کە پاراستنی ماف و بەرژەوەندیی گشت هاووڵاتییان و پێکهاتەکانی عێراق، پێویستی بە یەکخستنی ماڵی سیاسی و ڕێزگرتن لە بنەماکانی هاوبەشیی ڕاستەقینە هەیە.
ئەم دیدارەی نێوان مەسرور بارزانی و محەممەد ئەلحەلبووسی، نیشانەی بوونی "لێکتێگەیشتنێکی ستراتیژی"یە لە نێوان هەولێر و جەمسەرە کاریگەرەکانی عێراق. چاودێرانی سیاسی پێیان وایە کە ئەم جۆرە کۆبوونەوانە زەمینەخۆشکەرێکی بەهێزن بۆ یەکلاکردنەوەی دۆسیە هەستیارەکانی وەک "مووچە و شایستە داراییەکان" و "یاسای نەوت و گاز"، چونکە بوونی پشتیوانییەکی سیاسیی فراوان لە بەغدا، کاریگەری ڕاستەوخۆی دەبێت لەسەر تێپەڕاندنی ئاستەنگە پەرلەمانی و ئیدارییەکان.
سەردانەکەی مەسرور بارزانی بۆ بەغدا و دیدارەکانی لەگەڵ لایەنە جیاوازەکان، وەک "نەخشەڕێگەیەک" دەبینرێت بۆ جێگیرکردنی سەقامگیریی سیاسی و ئابووری، کە تێیدا مافە دەستوورییەکانی هەرێمی کوردستان هێڵی سوورن و سازشیان لەسەر ناکرێت.
