فەرمانگەی پەیوەندییەكانی دەرەوەی حكوومەتی هەرێمی كوردستان راگەیەنراوێك لەبارەی کۆتاییهاتنی ئەرکی هاوپەیمانان لە عێراق بڵاو دەكاتەوە و رایدەگەیەنێت، پڕۆسەكە بە هەماهەنگی و هاریکاری نێوان حکوومەتی هەرێم و حکوومەتی عێراق بەڕێوە چوو.
فەرمانگەی پەیوەندییەکانی دەرەوە رایگەیاند: ئەمڕۆ چوارشەممە کە کۆتایی بە ئەرکی سەربازی هاوپەیمانیی نێودەوڵەتی لە عێراق و هەرێمی کوردستان دێت، بە سوپاسێکی قووڵەوە یادی هەموو وڵات و هاوبەشە نێودەوڵەتییەکان دەکەینەوە کە بەشدارییان لە شەڕی دژی داعشدا کرد.
راشیگەیاند: لە ساڵی 2014ـەوە هێزەکانی هاوپەیمانی شانبەشانی هێزە ئەمنییەکانی عێراق و پێشمەرگە کاریان کردووە، پاڵپشتی شەڕ، ڕاهێنان، ڕاوێژ، هەواڵگری، کەرەستە و هاوکاری لۆجستییان پێشکەش کردووە، ئەم هەوڵە هاوبەشانە بوونە هۆی پاراستنی هەرێمی کوردستان، ئازادکردنی کۆمەڵگەکان و بەدیهێنانی شکستی خاکی داعش.
هەروەها رایگەیاند: فەرمانگەی پەیوەندییەکانی دەرەوە ڕێزێکی تایبەت پێشکەش بەو کەسانە دەکات کە گیانیان لەدەستدا یان بریندار بوون لە ماوەی ئەرکەکەدا. ئازایەتی و خزمەتەکەیان هەمیشە بە بەرزترین ڕێز و پێزانینەوە لە یاد دەمێنێتەوە.
فەرمانگەی پەیوەندییەکانی دەرەوە ئاماژەشیدا: کۆتاییهاتنی ئەرکی هاوپەیمانی لە ڕێگەی هەماهەنگی و هاریکاری تەواو لەنێوان حکوومەتی هەرێمی کوردستان و حکوومەتی فیدراڵی عێراقەوە بەڕێوە چووە. هەردوولا پابەندن بە کارکردنی پێکەوەیی بۆ ڕێگریکردن لە سەرهەڵدانەوەی داعش و ڕووبەڕووبوونەوەی هەر هەڕەشەیەک بۆ سەر ئاسایش و سەقامگیری عێراق و هەرێمی کوردستان.
گوتیشی كە کۆتاییهاتنی ئەرکی سەربازی گوزارشتە لە گواستنەوەیەک، نەک کۆتایی هاتنی ئەو هاوبەشییانەی لە ماوەی دوازدە ساڵی ڕابردوودا بنیاتنراون.
جەختیشی كردەوە كە حکوومەتی هەرێمی کوردستان چاوەڕوانی بەردەوامبوونی هاریکاری ئەمنی و سەربازییە لە چوارچێوەی ڕێککەوتنە دووقۆڵی و فرەلایەنە گونجاوەکاندا، لە هەمانکاتدا کردنەوەی بەشێکی فراوانتری پەیوەندییە دیپلۆماسی و ئابوورییەکان لە بوارەکانی بازرگانی، وەبەرهێنان، پەروەردە، گەشەپێدان و تەکنەلۆژیا.
فەرمانگەی پەیوەندییەکانی دەرەوە لە كۆتایی راگەیەنراوەكەدا سوپاس و پێزانینی هەمیشەیی حکوومەتی هەرێمی کوردستان و خەڵکی هەرێمی کوردستانی بۆ سەرجەم ئەندامانی هاوپەیمانیی نێودەوڵەتی دووپات كردەوە.
