بەڕێوەبەرایەتیی گشتیی کەشناسی و بومەلەرزەزانی حکوومەتی هەرێمی کوردستان، پێشبینییەکانی کەشوهەوای بۆ 48 کاتژمێری داهاتوو بڵاوکردەوە، کە تێیدا ئاماژە بە کاریگەریی نزمە پاڵەپەستۆی دەریای ناوەڕاست و بارانبارین لە زۆربەی ناوچەکان دەکات.
ئەمڕۆ پێنجشەممە 1ی تشرینی یەکەم، بەڕێوەبەرایەتی کەشناسی و بومەلەرزەزانی ڕایگەیاند: ئاسمان نیمچە هەور دەبێت و لە هەندێک ناوچە بۆ هەوری تەواو دەگۆڕێت. پێشبینی بارانبارین بە شێوەی نمەباران و بارانی مامناوەند بە پچڕپچڕی دەکرێت، هەندێک کاتیش هەورەبرووسکەی لەگەڵدا دەبێت. شەپۆلەکە سەرەتا لە سنووری پارێزگای دهۆک و ئیدارەی گەرمیان دەست پێدەکات و لە کاتەکانی ئێوارەدا لاواز دەبێتەوە. پلەی گەرما نزیک دەبێتەوە لە تۆمارەکانی دوێنێ.
بۆ سبەی هەینی 2ی تشرینی یەکەم، بە پێی پێشبینیەکانی کەشناسی، ئاسمان بە گشتی نیمچە هەور دەبێت و بارانبارینی مامناوەند و نمەبارانی پچڕپچڕ بەردەوام دەبێت. لە کاتەکانی بەیانیدا بارانبارینەکە سنووری پارێزگای دهۆک و ئیدارەی سۆران دەگرێتەوە، پاشان بۆ دوای نیوەڕۆ کاریگەرییەکەی درێژ دەبێتەوە بۆ سنووری پارێزگای سلێمانی و هەڵەبجە. پلەی گەرما بەراورد بە ئەمڕۆ 1 بۆ 2 پلە نزم دەبێتەوە.
بەرزترین پلەی گەرمای پێشبینیکراو بۆ ئەمڕۆ و سبەی بە پلەی سیلیزی:-
| شار و ناوچە جیاجیاکانی هەرێمی کوردستان | پێنجشەممە | هەینی |
| هەولێر | 30 | 29 |
| سلێمانی | 30 | 28 |
| دهۆک | 30 | 28 |
| هەڵەبجە | 31 | 29 |
| چەمچەماڵ | 30 | 29 |
| زاخۆ | 32 | 29 |
| ئاکرێ | 30 | 27 |
| گەرمیان | 34 | 33 |
| سۆران | 29 | 27 |
| پیرمام | 26 | 24 |
| حاجی ئۆمەران | 22 | 20 |
