ئه‌مرۆ شه‌ممه 15ی ئاب، لقی یه‌كی پارتی دیموكراتی كوردستان په‌یامێكی پیرۆزبایی به‌بۆنه‌ی 80 ساڵه‌ی یادی دامه‌زراندنی پارتی دیموكراتی كوردستان و له‌دایكبوونی سه‌رۆك بارزانی بڵاوكرده‌وه كه ئه‌مه ده‌قه‌كه‌یه‌تی ..
جەماوەرێ خۆڕاگر و سەربەرزێ کوردستانێ،
کادر، ئەندام و لایەنگرێن هێژا،
پێشمەرگێن قەهرەمان و خێزانێن سەربەرزێن شەهیدان،
ل 16ێ تەباخا ساڵا 1946ێ، د ناڤ تاریکیا بێئومێدی و پیلانێن ئیقلیمی دا، ڕۆژا ڤەژینا نەتەوەیی ب ڕاسپاردا بارزانیێ نەمر چەقیا. دامەزراندنا پارتی دیموکراتی کوردستان نە ب تنێ رووداوەکا ئاسایی یا مێژوویی بوو، بەلکو وەرچەرخانەکا شارستانی، هزری و سیاسی بوو د ئیرادەیا مرۆڤێ کوردستانی دا.
ئەڤرۆ، د 80مین سالڤەگەرا ڤێ ئیرادەیێ دا، لقێ ئێکێ پارتی دیموکراتی کوردستان ڤێ پەیامێ وەک نەخشەڕێیەکا کارکرنێ ئاڕاستەی جەماوەرێ هێژا و بەرەبابێ نوی یێ نەتەوا مە دکەت:
١. ڕەهەندێ نەتەوەیی و نیشتمانی: (ڕەسەنایەتی، ناسنامە و ئیرادە)
ڕێبازا بارزانی؛ بڕبڕەیا پشتا بزاڤا رزگاریخواز: ڕێبازا بارزانیێ نەمر وەک فەلسەفەیەکا نەتەوەیی، شییا بێهیڤیبوونێ د ناخێ کوردستانیان دا تێکبشکێنیت و باوەربوونا ب خۆ د ناڤ جڤاکی دا بچێنیت.
تەباییا کۆمەڵایەتی و پێکڤەژیان: نیشتمانپەروەری ل دەڤ پارتی تنێ دروشم نینە؛ بەلکو پاراستنا تەباییا کولتوری، ئایینی و مەزهەبی یا کوردستانێ یە. پارتی سەکۆیەکی بەرفرەهـ بوویە بۆ هەمی تەخ و توێژان دا کو ب ئێک ئارمانج بەرەڤ مافێ بڕیاردان ل سەر چارەنڤیسێ خۆ پێنگاڤان ب هاڤێژن.
پێشمەرگە و سەربەرزی: هێزا پێشمەرگەی سیمبولا سەرفەرازی و پارێزەرا ئاڵا و خاکی یە. وەفاداری بۆ خوینا شەهیدان ئەو شەنگەستەیە کو قەوارێ هەرێما کوردستانێ ل سەر هاتیە ئاڤاکرن.
٢. ڕەهەندێ سیاسی و حوکمرانی: (سەقامگیری، دەستوور و دامەزراوەییکرن)
ژ شەرعیەتا شۆڕشگێڕی بۆ شەرعیەتا یاسایی: پارتی ب ڕێبەریا سەرۆک مەسعود بارزانی پێشەنگیا ڤەگوهاستنا خەباتا چەکداری بۆ ئاڤاکرنا دامەزراوەیێن دیموکراتی (پەرلەمان و حکومەت) ل ساڵا 1992ێ کر.
پاراستنا قەوارێ دەستووری یێ هەرێمێ: د قۆناغا ئاڵۆزا هەرێمایەتی و عێراقێ دا، لقێ ئێک دووپاتیێ ل سەر پاراستنا کیانێ سیاسی و فیدرالی یێ هەرێما کوردستانێ دکەتن. ئەڤ قەوارەیە دەستکەفتێ خوینا سەدان هەزار شەهیدانە و بەزاندنا هێڵێن سۆرێن دەستووری ژ لایێ هەر لایەنەکێ ڤە رەتکرییە.
دیپلۆماسیەت و پێگەهێ ئیقلیمی: پارتی شیا خەباتا مەدەنی و دیپلۆماسی بکەتە ئامرازەک بۆ ناساندنا دۆزا ڕەوا ئا گەلێ کوردستانێ ل مەیدانا نیڤدەولەتی، کو چاڤێ جیهانێ وەک فاکتەرەکێ سەرەکی یێ سەقامگیریێ ل هەرێمێ بنێڕیت.
٣. ڕەهەندێ ئەکادیمی، هزری و پاشەڕۆژسازی: (زانست، نووژەنکرن و گەشەپێدان)
حوکمرانیا زانست-تەوەر: ئالۆزیێن جیهانا ئەڤرۆ پێدڤی ب ئەقلانیەت، هزرکرنا ستراتیژی و توێژینەوا ئەکادیمی هەنە. پارتی باوەریا تەمام ب شیانێن زانستخواز، پرۆفیسۆر و توێژەرێن زانکۆیان هەیە بۆ داڕشتنا سیاسەتێن گشتی یێن وەلات.
ڕۆلێ گەنجان و تەکنەلۆجیایێ: پێشخستنا ئابۆری، جڤاک و ڕێڤەبرنێ ب بێ ئاڤەدانکرنا هۆشێ گەنجان و بکارئینانا تەکنەلۆجیا سەردەم ناێتە دیارکرن. زانکۆ و ناڤەندێن زانستی دڤێت ببنە دیپۆماتکارێن هزری و لێپرسینێن ئەکادیمی بۆ پشتەڤانیکرنا بڕیارا سیاسی.
گەشەپێدانا بەردەوام: ئاڤاکرنا ژێرخانا ئابۆری، خودانکرنا ژینگەهێ، باشکرنا کەرتێ پەروەردێ و تەندروستیێ، پایەیێن سەرەکی یێن بەردەوامیپێدانا کاروانێ حوکمرانیا هەرێما کوردستانێ نە.
٤. پەیمان و بەردەوامی
ئەم ل لقێ ئێکێ پارتی دیموکراتی کوردستان—ل دەڤەرا بادینانا ڕەنگین و خۆڕاگر—پەیمانا وەفاداریێ بۆ ڕێبازا پیرۆزا بارزانیێ نەمر، کاک ئیدریسێ هەردەم ساخ، و ڕێبەرێ نەتەوەیی سەرۆک مەسعود بارزانی نوو دکەینەڤە.
ئەم دێ دەست کەڤتیێن گەلێ خۆ پارێزین، دێ بینە پشت و پەناها گەنجان، زانستخوازان، ئافرەتان، ڕەوشەنبیران و تەڤایا جەماوەرێ دەڤەرێ بێ جوداهی.
نەمری بۆ شەهیدێن ڕێیا رزگاریا کوردستانێ.
پیرۆزبیت 80 سالیا خەبات، سەربەرزی و نویبوونەوەیا پارتی دیموکراتی کوردستان.
پیرۆزبیت ڕۆژا ژدایکبوونا سەرۆک مەسعود بارزانی.
بژی کورد و کوردستان
لقێ ئێکێ پارتی دیموکراتی کوردستان
15ی ئابی 2026
