ڕاگەیەندراوێک لە یەکێتی ئافرەتانی کوردستانەوە بۆ ڕای گشتی

یه‌كێتی ئافره‌تانی كوردستان له‌ ڕاگه‌یه‌نراوێكدا به‌ توندی ئیدانه‌ی ئه‌و هێرشه‌ درۆنییه‌ ده‌كات كه‌ ئه‌مرۆ دووشه‌ممه‌ كرایه‌ سه‌ر نووسینگه‌ی تایبه‌تی مه‌سرور بارزانی سه‌رۆكی حكوومه‌تی هه‌رێم و به‌ تێكدانی ئارامی كوردستان ناویان هێناوه‌.

ئه‌وه‌ش ده‌قی ڕاگه‌یه‌نراوه‌كه‌ی یه‌كێتی ئافره‌تانی كوردستانه‌..

ئێمە لە یەکێتی ئافرەتانی کوردستان، بە توندترین شێوە ئیدانە و سەرکۆنەی ئەو هێرشە تێکدەرانە و دەستدرێژییە ناڕەوایە دەکەین کە کرایە سەر ئۆفیسی تایبەتی جەنابی کاک (مەسروور بارزانی) سەرۆکی حکوومەتی هەرێمی کوردستان و شوێنی حەوانەوەی بەڕێوەبەری ئاژانسی پاراستن.

ئەم کارە دوژمنکارانەیە، هەنگاوێکی مەترسیدار و هەوڵێکی نەزۆکانەیە بۆ تێکدانی ئارامی و سەقامگیری هەرێمەکەمان.

بە ئامانجگرتنی دامەزراوە شەرعی و دەستوورییەکانی هەرێمی کوردستان، تەنها هێرش نییە بۆ سەر کەس یان لایەنێک، بەڵکو هێرشێکی ڕاستەوخۆیە بۆ سەر شکۆ و ئاسایشی هەموو تاکێکی کورد و قەوارەی هەرێمی کوردستان.

لێرەوە بە دەنگی بەرز ڕایدەگەیەنین، کە ئەم جۆرە هێرشە نەک هەر ناتوانن ئیرادەی گەلی ئێمە و خۆڕاگریمان بشکێنن، بەڵکو سوورترمان دەکەن لەسەر پاراستنی دەستکەوتە نەتەوەییەکانمان.