پێشبینی دەكرێت بەرەبەیانی سبەی دووشەممە شەپۆڵێكی بارانبارین بگاتە هەرێمی كوردستان و بەهۆیەوە لە زۆربەی ناوچەكان بارانی بەخوڕ ببارێت.
هەڤاڵ سدیق گەڵۆزی شارەزای كەشناسی رایدەگەیەنێت: ئەمشەو بارستە هەورێکی زەبەلاحی چڕی باراناوی داخیلی پارێزگای ئەنبار بووە و بەرەو ناوچەکانی باشووری مووسڵ لە جوولەدایە کە هەڵگری تاوەبارانی بەخوڕ و هەورەبروسکەی بەهێزە.
راشیگەیاند: پێشبینی دەكرێت كاریگەری ئەم هەورە باراناوییە درەنگانی ئەمشەو بۆ کاتەكانی بەرەبەیان بگاتە هەرێمی کوردستان.
هەروەها رایگەیاند: بەو هۆیەوە سبەی دووشەممە تاوەبارانی بەخوڕ و هەورەبروسکە بەشێکی زۆری ناوچە جیاوازەکانی هەرێمی كوردستان دەگرێتەوە.
ئەو شارەزایەی كەشناسی گوتیشی، پێشبینی دەكرێت كەشوهەوای سبەی دووشەممەی زۆربەی ناوچەكانی هەرێمی كوردستان ناسەقامگیربێت و بە پچڕپچڕی باران ببارێت.
