سەرۆکایەتیی شارەوانیی هەولێر بەشێک لە شەقام و کۆڵانەکانی هەولێری نۆژەن کردەوە و دەڵێت، بۆ قیرتاوکردنەوەی ئەو شەقامانە زیاتر لە 395 تۆن قیرمان بەکار هێناوە.
ئەمڕۆ چوارشەممە، سەرۆکایەتیی شارەوانیی هەولێر بڵاوی کردەوە، کە بە هاوبەشی لەگەڵ هەر شەش بەڕێوەبەرایەتییەکانی شارەوانی و بە هەماهەنگی لەگەڵ کارگەی قیری سەرۆکایەتی شارەوانی دەستیان بە چاکردنەوەی بەشێک لە شەقام و کۆڵانە تێکچووەکانی هەولێر کرد.
بە گوێرەی داتاکانی سەرۆکایەتیی شارەوانیی هەولێر، زیرە لە دوو هەزار و 150 مەتر دووجا کاری قیرتاوکردن ئەنجام دراوە و بۆ ئەم مەبەستەش بڕی 395 تۆن قیر بەکار هێنراوە.
بە ئامانجی باشترکردنی ڕێگاوبان و پاراستنی سەلامەتی هاووڵاتیان و شوفێران، سەرۆکایەتیی شارەوانیی هەولێر بەردەوامە لە گەیاندنی خزمەتگوزاری شەقام .
سەرۆکایەتیی شارەوانیی هەولێر ناوی ئەو شەقام و کۆڵانانەی ئاشکرا کردووە کە کاری چاککردنەوەی بۆ کردوون لەوانە ( هەولێری نوێ، ڕێگای کۆنی بنەسڵاوه، مەنتکاوە شەقامی شەهید سمکۆ، چوار سایدی گەڕەکی نەورۆز و کوردستان، شەقامی دادگای هەولێر، سەرەکۆڵانێک لە گەڕەکی بەختیاری).
