بەڕێوەبەرایەتی شارەوانی هەولێر ڕایدەگەیەنێت، دیاردەیەک لە نێو شەقامەکانی شاری هەولێر سەری هەڵداوە کە تیایدا ماتۆڕسکیلەکانی تایبەت بە گەیاندنی خواردن (دیلیڤەری)، لە پێناو پەلەکردن و بەزاندنی کات، کێربستۆنی دوورگە ناوەندییەکان دەشکێنن و ڕێڕەوی نایاسایی بۆ خۆیان دروست دەکەن.
بەپێی ڕاگەیەندراوێکی شارەوانی هەولێر، ئەم رەفتارانە جگە لەوەی پێشێلکردنی ئاشکرای یاسای هاتوچۆن، مەترسییەکی گەورەش بۆ سەر گیانی هاووڵاتییان دروست دەکەن و دەبنە هۆی تێکدانی سیمای شار و وێرانکردنی شۆستە، سەوزایی و دار و درەختەکان کە بە پارەی گشتی خزمەت دەکرێن.
شارەوانی هەولێر داوا لە سەرجەم کۆمپانیاکانی گەیاندنی خێرا دەکات:
1- بە زوترین کات سەرجەم ماتۆڕسوارەکانیان ئاگادار بکەنەوە کە پابەندی ڕێڕەوە فەرمییەکان بن.
2- لە حاڵەتی دووبارەبوونەوەی هەر سەرپێچییەک، شارەوانی ناچارە دەست بەسەر ماتۆڕسکیلەکاندا بگرێت.
3- ڕێکاری یاسایی توند بەرامبەر خودی کۆمپانیاکەش دەگیرێتە بەر و دۆسییەکانیان ڕەوانەی دادگا دەکرێت.
لە کۆتاییدا، شارەوانی هەولێر داوا لە هاووڵاتییان دەکات، وەک بەشێک لە ئەرکی نیشتمانی، لە کاتی بینینی هەر سەرپێچییەک لەم شێوەیە، وێنەی سەرپێچیکاران بگرن و بۆ شارەوانی ڕەوانەی بکەن، تاوەکو کاردانەوەی یاسایی پێویستیان لەگەڵ بکرێت.
