بەڕێوەبەرایەتیی ئاوی سلێمانی ئاگادارییەکی بەپەلەی بڵاوکردەوە و ڕایگەیاند، کە بەهۆی شکانی بۆرییەکی سەرەکیی گواستنەوەی ئاو، دابەشکردنی ئاوی خواردنەوە لە چەندین گەڕەک و شارۆچکەی سنووری پارێزگاکە بە شێوەیەکی کاتی دەوەستێت.
بەپێی ڕاگەیەندراوی بەڕێوەبەرایەتییەکە، ئەم بڕانەی ئاو سەرجەم ئەو گەڕەکانە دەگرێتەوە کە دەکەونە دەرەوەی شەقامی 60 مەتریی شاری سلێمانی. هەروەها ناوچەکانی ڕاپەڕین، تاسلوجە و قەزای چەمچەماڵ ڕاستەوخۆ دەکەونە ژێر کاریگەریی ئەم گرفتە تەکنیکییەوە.
جگە لە سەنتەری شار، بڕیارەکە چەندین ناحیە و کۆمەڵگەی دیکەش دەگرێتەوە، لەوانە: شۆڕش، تەکێ، بازیان، گۆپاڵە، باینجان و ئەڵڵایی. بەرپرسانی ئاو داوا لە هاووڵاتییانی ئەو شوێنانە دەکەن کە بەوپەڕی دەستپێوەگرتنەوە ئاو بەکاربهێنن تاوەکو تیمە تەکنیکییەکان کارەکانیان تەواو دەکەن.
تاوەکو ئێستا بەڕێوەبەرایەتیی ئاوی سلێمانی کاتی تەواوبوونی چاککردنەوەی بۆرییەکەی ڕانەگەیاندووە، بەڵام جەختی کردووەتەوە کە تیمەکانیان لە شوێنی ڕووداوەکەن و هەوڵ دەدەن لە زووترین کاتدا دابەشکردنی ئاو بۆ ئەو ناوچانە بگەڕێننەوە باری ئاسایی.
