بەڕێوەبەرایەتیی بەرگریی شارستانیی سۆران بە دیانا سامی پەیامنێری (کوردستان تیڤی) ڕایگەیاند، کە ڕووداوێکی ئاگرکەوتنەوە لە پوش و پەڵاشی ناوچەی گەشتیاریی "خەرەند" لە سنووری قەزای ڕواندز ڕوویدا.
هەر لەگەڵ ئاگادارکردنەوەیان، دەستبەجێ تیمەکانی ئاگرکوژێنەوە و تیمی ڕزگارکردنی بنکەی بەرگریی شارستانیی ڕواندز گەیشتنە شوێنی ڕووداوەکە. تیمەکان توانییان لە ماوەیەکی کورتدا ئاگرەکە بە تەواوی بکوژێننەوە و ڕێگری بکەن لەوەی زیاتر بڵاوببێتەوە و زیان بە ژینگەی ناوچەکە بگەیەنێت.
بەپێی زانیارییەکانی بەرگریی شارستانی، ڕووداوەکە تەنها زیانی ماددی لێکەوتووەتەوە و هیچ زیانێکی گیانی نەبووە. بەرگری شارستانی جارێکی تر هۆشداری دەداتە هاووڵاتیان و گەشتیاران کە لە وەرزی گەرمادا وریای پاشماوەی ئاگر بن، بۆ ئەوەی ڕێگری لە سوتانی ژینگەی کوردستان بگرن.
