گوتەبێژی بەڕێوەبەرایەتی حەج و عومڕەی کوردستان رایگەیاند، رۆژی پێنجشەممەی هەفتەی داهاتوو رێكەوتی 4/6/2026 یەکەم کاروانی حاجییان دەگەڕێنەوە کوردستان كە بۆ ئەمساڵ بۆ فەریزەی حەج بەشێوەیەكی گشتی 1027 حاجی سەردانی وڵاتی سعوودییەیان كردووە.
کاروان ستوونی گوتەبێژی بەڕێوەبەرایەتی حەج و عومڕەی کوردستان راشیگەیاند: ئەو دەنگۆیانەی بڵاوکراونەتەوە سەبارەت بە گەڕانەوەی حاجیان گوایە یەکەم کاروانی حاجییانی کوردستان لە ڕێكەوتی 10/6/2026 دەگەڕێنەوە، ڕاست نین.
هەروەها رایگەیاند: زانیاری دروست و تەواو ئەوەیە کە یەکەم کاروانی حاجییان لە ڕێكەوتی 4/6/2026 لە رێگەی فرۆکەخانەی نێودەوڵەتی هەولێرەوە دەگەڕێنەوە هەرێمی كوردستان.
کاروان ستوونی هەروەها ئەوەشی خستەڕوو کە تاوەکو ئێستا دوایین کات بۆ گەڕانەوەی تەواوی حاجییانی هەرێمی كوردستان دیاری نەکراوە.
گوتەبێژی حەج و عومڕەی کوردستان گوتیشی كە حاجییان دوای تەواوبوونیان لە شاری مەککە، ماوەی 4 رۆژ لە شاری مەدینە دەمێننەوە، ئینجا بەرەو کوردستان دەگەڕێنەوە.
