وەزارەتی کارەبای هەرێمی کوردستان ڕایگەیاند، پڕۆسەی چاکسازیی تۆڕەکانی هێڵی پاڵەپەستۆی بەرزی کارەبا لە نێوان پارێزگاکانی هەولێر و دهۆک بە سەرکەوتوویی کۆتایی هات.
ئەمڕۆ شەممە 12ـی ئەیلوول، وەزارەتی کارەبای حکوومەتی هەرێمی کوردستان ڕایگەیاند: کە پڕۆسەکە بەیانی ئەمڕۆ لە کاتژمێر 04:00ـی بەرەبەیان دەستی پێکرد و تا کاتژمێر 10:00ـی بەیانی بەردەوام بوو. تیمە تەکنیکییەکانی وەزارەت توانییان تەواوی کاری چاکسازییەکە بۆ تۆڕەکان ئەنجام بدەن و توانای جێگیریی تۆڕەکە و گواستنەوەی کارەبا بەرز بکەنەوە.
وەزارەتی کارەبا جەختی لەوە کردووەتەوە، کە سەرەڕای ئەنجامدانی ئەو پڕۆسە گرنگە، بەڵام بە شێوەیەکی پیشەییانە بەڕێوەچوو و هیچ کاریگەرییەکی لەسەر بڕینی کارەبای هاوبەشانی پارێزگای دهۆک و ئیدارەی سەربەخۆی زاخۆ نەبوو، کارەبای هاووڵاتیان بەبێ پچڕان بەردەوام بوو.
