رێبەر ئەحمەد، وەزیری ناوخۆی حکوومەتی هەرێمی کوردستان، مژدەی بەرزکردنەوەی پلەی ئەو ئەفسەر و کارمەندانەی راگەیاند کە شایستەی پلەبەرزکردنەوەن و ئاماژەی بەوە کرد کە پرۆسەکە لە قۆناغی کۆتاییدایە.
لە لێدوانێکی تایبەتدا بۆ گۆران سدیق، پەیامنێری (کوردستان تیڤی)، رێبەر ئەحمەد رایگەیاند: "بە فەرمانی مەسرور بارزانی، سەرۆکی حکوومەتی هەرێمی کوردستان، بڕیاردراوە بە بەرزکردنەوەی پلەی ئەو کەسانەی کە شایستەی پلەبەرزکردنەوەن لە ناو وەزارەتی ناوخۆ و دامودەزگاکانی تری حکومەت."
سەبارەت بە رێکارە کارگێڕییەکان و کاتی جێبەجێکردنی بڕیارەکە، وەزیری ناوخۆ ئاشکرای کرد: "تەواوی نوسراو و لیستی ناوەکان ئاراستەی سەرۆکایەتی هەرێمی کوردستان کراون بۆ ئەوەی رێکارە یاسایی و کارگێڕییەکانیان بۆ تەواو بکرێت."
رێبەر ئەحمەد دڵنیایی دایە ئەفسەر و کارمەندانی هێزەکانی ناوخۆ و رایگەیاند: "لە ماوەیەکی زۆر کورتدا پلەکان بەرز دەکرێنەوە و هەر کەسێک کە بەپێی یاسا و ڕێنماییەکان شایەنی پلەبەرزکردنەوە بێت، پلەکەی بۆ بەرز دەکرێتەوە و مافەکانی پارێزراو دەبێت."
ئەم بڕیارەی سەرۆکی حکوومەت و وەزارەتی ناوخۆ، لە چوارچێوەی هەوڵەکانی کابینەی نۆیەمدا دێت بۆ ڕێکخستنەوەی میلاکات و پێدانی شایستە دارایی و کارگێڕییەکان بە کارمەندانی کەرتی گشتی و هێزەکانی ناوخۆ، کە ماوەیەک بوو بەهۆی چەند هۆکارێکی جیاوازەوە پرۆسەی پلەبەرزکردنەوەیان ڕاوەستابوو.
